Хүүхдийн цахим хэрэглээг багасгах, танин мэдэхүйн мэдлэг олгох ажлын хүрээнд ерөнхий боловсролын сургуулийн бие даалтын долоо хоногт дүүргийн нутаг дэвсгэрт байрлах түүх, соёлын хөшөө дурсгалт газруудтай танилцуулах нэг өдрийн аяллыг зохион байгууллаа. Аяллыг дүүргийн Засаг даргын Тамгын газрын Нийгмийн хөгжлийн хэлтсээс удирдан зохион байгуулж, Эрдмийн хөтөч цогцолбор, 71-р сургуулийн дунд, ахлах ангийн 90 сурагчийг хамруулав. Сурагчид нэг өдрийн аялалын үеэр 17 дугаар хорооны нутаг дэвсгэрт байрлах Дамбадаржаалин хийд, 20 дугаар хороо, Бэлхийн аман дахь Хүннүгийн язгууртны түүхэн дурсгалт газар болон Монголын Хүүхдийн Урлан Бүтээх Төвийн үйл ажиллагаатай танилцсан юм. Хүннүгийн язгууртны түүхэн дурсгалт газрын талаар Шинжлэх Ухааны академийн Археологийн хүрээлэнгийн доктор Н.Эрдэнэ-Очир тайлбарлаж, түүх соёлын боловсрол олголоо.

Монголын эртний нүүдэлчдийн анхны төрт улс болох Хүннү гүрний язгууртны булш, оршуулга бүхий энэ газар 2024 оны 10 дугаар сарын 16-ны өдөр Унгар улсын элчин сайдын яамнаас “Атиллагийн багана” буюу хамтарсан экспедицийн малтлагыг мөнхжүүлсэн дурсгалын хөшөөг босгосон. Улаанбаатар хотын төвөөс 22 км зайд байрлах Хүннүгийн язгууртны булш нь НТӨ III- НТ I зууны үед холбогдох бөгөөд Бэлхийн ам, Сэлбэ голын баруун биед баруун талаараа өндөр уулаар хүрээлэгдсэн, урд талаараа задгай, хойд талаараа шилмүүст ойтой уулын онь дэвсэг газарт оршдог бүрэн судлагдаагүй дурсгал юм. Энэхүү язгууртны булш нь Улаанбаатар хотод байрлаж буй Хүннүгийн үеэс олдсон анхны түүх, соёлын дурсгал тул ШУА-ийн Археологийн хүрээлэнгээс дэлхийн өвд бүртгүүлэхээр UNESCO-д хандаад байгаа ажээ.