Монголын үйлдвэрчний эвлэлийн холбооноос Улсын Их Хурал ирэх жилийн улсын төсвийн төслийг хэлэлцэж буйтай холбогдуулан иргэдийн хөдөлмөр, нийгмийн хамгааллын асуудлаар хэвлэлийн бага хурал хийлээ.
Хурлын үеэр МҮЭХ-ны ерөнхийлөгч Х.Амгаланбаатар “Мэргэжлийн байгууллагаас судалгаа хийхэд шалгуур үзүүлэлтийнхээ дагуу 1779 ажлын байрыг хэвийн бус нөхцөл байдалтай гэж дүгнэсэн. Үүний дагуу эрт тэтгэвэр тогтоох зардлыг улсын төсөвт зайлшгүй тусгах шаардлагатай байна. 2017 онд улсын эдийн засгийн байдал хүнд байсан учир МҮЭХ, Олон Улсын Валютын Сантай тодорхой татвар шимтгэлийг нэмэгдүүлэх хэлэлцээр хийсний үндсэн дээр нийгмийн даатгалын шимтгэлийн эхний нэмэгдлийг хүлээн зөвшөөрсөн.

Монгол Улсын Засгийн газар, Сангийн сайд, Хөдөлмөр нийгмийн хамгааллын сайд 2020 оноос нийгмийн даатгалын шимтгэлийг дахин нэмэгдүүлэхгүй байх арга хэмжээг бидэнтэй хамтарч авна гэж амласан. Гэсэн хэдий ч энэ амлалтаа умартаж 2020 оны нэгдүгээр сарын 1-нээс шимтгэлийг дахин нэмэгдүүлэхийг төсөвт оруулж байгаа нь бидний дургүйцлийг хүргэж байна.
Үүнийг нэмэгдүүлснээр иргэдийн бодит худалдан авах чадвар буурна. Хувийн компани ажилчдынхаа цалин хөлсийг нэмэгдүүлэх бололцоо, хөдөлмөр нийгмийн хамгаалалд зориулах хөрөнгийн эх үүсвэр хумигдана.Тэтгэвэр тэтгэмж нэмэх асуудлыг инфляцын түвшинтэй уялдуулана гэсэн. Үүнийг баталгаажуулах ёстой гэдэг саналыг МҮЭХ, нийт 36 гишүүн байгууллага, 3000 орчим аж ахуй нэгж байгууллагын дэргэд ажиллаж буй үйлдвэрчний эвлэлийн хороод 445 мянга гаруй гишүүдийнхээ өмнөөс санал болгон хүргүүлсэн” гэж ярилаа.

Монголын төмөр замчдын холбоон дарга Б.Баяраа “Монгол Улсын иргэн эрүүл, аюулгүй орчинд хөдөлмөрлөх эрхтэй. Гэтэл бид ямар нөхцөлд, ямар цалин хөлстэй ажиллаж байгааг авч үзэхэд үнэхээр хүнд байна. Хөдөлмөрлөж буй хүмүүсийн төлөө төр засаг юу ч хийхгүй байна. Эрдэнэтийн захирал гэх хувь хүний ажилчдынхаа төлөө хийж буй үйлдэл нь зөв. Сайдтай утсаар яриад л 77-р тушаалд өөрчлөлт оруулж чадсан. Ийм ялгавартай хандаж буй нь МҮЭХ-ны олон жил явуулсан үйл ажиллагааны үнэ цэнийг бууруулж байна. Хөдөлмөрч хүнийг ялгаварлах увайгүй нүүр царай ил болж харагдаж байна. Аливаа асуудлыг нам, танил тал, үзэл суртлаараа шийдэж болж байвал нийгэм дэх үнэ цэнтэй хүмүүсийг үгүйсгэж байна гэсэн үг. Хатуугаар хэлбэл энэ ялгаварлал бол үйлдвэрчний байгууллагуудыг дотор нь хагалан бутаргах хэлбэр.Гадуур урсгаад байгаа их мөнгийг хөдөлмөрийн аюулгүй байдал, эрүүл ахуйдаа зарвал бидний эгэл амьдралаас алдаж байгаа хүний тоо цөөрнө. Ажлын байрны эмх цэгц, аюулгүй байдал ч дээшилнэ. Тийм учраас сонгуулийн элдэв сурталчилгаанд зардаг мөнгөө хөдөлмөрийн аюулгүй байдал, эрүүл мэндэд зарцуул. Мөн иргэдийн өгдөг нийгмийн даатгалын болон бусад шимтгэл онгорхой сав руу урсч байна. Элсэнд ус дусааж байгаагаас ялгаагүй. Бүх юмыг улс төрийн өнцгөөр биш иргэн хүнд хэрхэн хүрч байгааг л харах хэрэгтэй” гэсэн юм.