Нийслэлчүүд түүхий нүүрснээс татгалзаж, сайжруулсан шахмал түлш хэрэглэж эхэлснээс хойш мянга гаруй иргэн угаарын хийд хордож, найман хүн нас барсан гэдэг албан мэдээ бий. Албан бусаар 25 настай залуу болоод 10 настай хүүхэд хоёр гэртээ, гал түлсний дараа яндангаа авсны улмаас амиа алдсан тохиолдол гарсан.

Угаарын хийд хордсон, амиа алдсан иргэдийн асуудлыг эрх баригчид өөрсдийн буруутай үйл ажиллагаанаас болсон гэдэг мэдээлэл өгч байгаа. Өөрөөр хэлбэл, зуухныхаа хаалтыг хаасан, шахмал түлшээ их хэмжээгээр хийж түлсэн гэх мэтээр иргэдийг буруутгаж байгаа. Яг үнэндээ “Таван толгой түлш” ХХК сайжруулсан түлшний хаяг шошго дээр “Бүх төрлийн зууханд тохиромжтой” гэх ташаа мэдээлэл өгснөөс эдгээр хүмүүс хордсон гэхэд болно.

НЗДТГ-аас зохион байгуулсан шахмал түлшний талаарх нийтийн сонсголын үеэр НИТХ дахь Ардчилсан намын бүлгийн дарга Ц.Баатархүү, “Өнөөдөр иргэдийн зүгээс хариулт нэхэж буй хамгийн гол асуулт бол төслийн биш энгийн зуухтай айлууд нийт өрхийн 62.7 хувь байна гэж үзэж байгаа. Шахмал түлш төслийн зууханд тохирч байна. Харин энгийн зуухтай 100 гаруй мянган айлд түлшийг хэрхэн тохируулах вэ? гэдэг асуулт тулгарч байна” гэсэн юм.

Харин хотын дарга С.Амарсайхан “Утаа мэдрэгч айл өрхийн амь насыг бүрэн хамгаална гэсэн 100 хувийн баталгаа биш. Эрсдэлээс урьдчилан сэргийлэх, дохио мэдээлэл авах төхөөрөмж. Утаа мэдрэгчийг 200 мянган айлд өгөх хэмжээгээр бэлэн үйлдвэрлэчихсэн байдаггүй юм байна. Тийм болохоор бид захиалга өгнө” гэж байлаа.

Дээрх хоёр мэдэгдлээс харвал, 200 мянган айл өрх бүрт утаа мэдрэгч хэрэгтэй юу гэдэг асуулт гарч ирэхээр байна. 6.6 тэрбум төгрөгөөр айл бүрт утаа мэдрэгч захиалж өгснөөс, шахмал түлшээ түлэхээс айж суугаа 100 мянган айлын зуухыг солиод өгсөн нь илүү дээр юм биш үү.