Үндсэн хуулийн цэцийн дарга асан Д.Одбаяр өнгөрсөн арваннэгдүгээр сард Улаанбаатараас-Сөүл рүү зорчиж явахдаа онгоцны үйлчлэгчид ёс зүйгүй үйлдэл гаргасан хэргээр БНСУ-ын хуулийн байгууллагад шалгагдаж, 10 хоногийн хилийн хориг тавиулсан билээ. Улмаар Д.Одбаяр хэргээ хүлээж, долоон сая орчим воноор торгуулан Монголд буцаж ирсэн. Тэрбээр дээрх дуулианы дараа ҮХЦ-ийн даргаасаа чөлөөлөгдсөн ч гишүүн хэвээрээ үлдээд байгаа юм.
 Тэгвэл “Ялгаварлалыг хариуцлагажуулъя” нэгдлээс Үндсэн хуулийн цэцийн гишүүн Д.Одбаярыг огцрохыг шаардсаар байна. Тэд Үндсэн хуулийн цэцийн гадна талбайд жагсч, Д.Одбаярыг огцруулахыг дэмжиж буй иргэдээс гарын үсэг цуглуулж байгаа аж. Жагсаалын үеэр тэд, “Хүчирхийлэгчийг хулгайчид хаацайлахаа зогсоо”, “Одбаяр цэцээс огцор”, “Өгзөг барьсан савраа Үндсэн хуулиас тат” зэрэг лоозонг барьж, эцсээ хүртэл тэмцэнэ гэдгээ илэрхийлж байсан юм.
 Энэ талаар тус нэгдлийн гишүүн Х.Ичинноров ярихдаа “Ажлын байрны бэлгийн дарамттай холбоотойгоор бид бүхний шаардлагыг дахин дамжуулж байна. Энэ хүн Монгол Улсын нэр хүндийг гутаасан. Нөгөө талаар эмэгтэй хүний биед халдсанаас хойш тодорхой хугацаа өнгөрлөө. Энэ хугацаанд Д.Одбаяр хариуцлага хүлээх болов уу, огцрох болов уу, ажлын байрны бэлгийн дарамт гэдэг асуудлыг улстөрчид анхааралдаа авах болов уу гэсэн боловч хангалттай үр дүн гарсангүй. Энэ хүн бол үндсэндээ биднийг хуурлаа. Хариуцлага хүлээлгэх шаардлагатай гэсэн дуу хоолой маш тодорхой байсан. Ийм ёсзүйгүй үйлдлийг цэцийн дарга нь л хийж болдоггүй, бусад хүмүүс хийж болдог гэж ойлгох боломжгүй байна. Тийм учраас энэ асуудлыг эцэст нь тултал явъя гэж байгаа юм. Ажлын байрны бэлгийн дарамтын хууль эрхзүйн орчныг цогцоор нь шинэчлэх шаардлагатай байна. Цэц гэдэг байгууллага маань ийм хүмүүс бүрддэг нөхцөл байдлыг гарцаагүй өөрчлөх хэрэгтэй” гэлээ.
 Мөн тус нэгдлийнхэн Цэцийн гишүүн Д.Одбаяр ҮХЦ-ийн даргын албан тушаалаас огцорсноор хариуцлага хүлээж байгаа юм биш, Цэцийн гишүүнээсээ ч давхар чөлөөлөгдөх ёстой. БНСУ-д ажиллаж, амьдарч буй 50 мянган Монгол иргэнээс уучлал гуйх ёстой гэдэг шаардлагыг тавьж байна. Одоогоор тэдний энэхүү шаардлагад 6000 хүн гарын үсгээ зурж, нэгдсэн бөгөөд 7500 хүн болоход шаардлагаа Үндсэн хуулийн цэцэд өгнө гэж байлаа.