Дэлхийн байгаль хамгаалах сангаас хэрэгжүүлж буй төслийн хүрээнд Завхан аймгийн Дөрвөлжин сумын эмэгтэйчүүд нэгдэн "Эвсэг эмэгтэйчүүд" ТББ байгуулан, тэмээ, торомны ноос, хонины ноосоор хамтран гар урлалын бүтээгдэхүүн хийж захиалгаар Франц улсад гаргаж байна. Монгол үндэсний бүтээлийг манай улсад ирсэн Францын жуулчид, зочид төлөөлөл тахийн нутгийн бүтээгдэхүүн гэж онцлон авч, Франц улсын "Виларе" төвөөс захиалан эсгий улавч, Тахийн зурагтай түлхүүрний оосор, “Хомын тал” гэсэн бэлэг дурсгалын жижиг гэр зэрэг гар урлалын бүтээгдэхүүнийг ихэд сонирхон авах болжээ. Дэлхийн байгаль хамгаалах сангийн дэмжлэгтэй хэрэгжүүлж буй тахь нутагшуулах төслийн хүрээнд, Францын тахь хамгаалах төвтэй хамтран ийнхүү монгол бүтээгдэхүүнийг Франц улсад экспортолж байгаа юм. “Улаан ном”-д орсон тахийн сүргийн төрөл зүйлийг нэмэгдүүлэх, удмын санг нь хадгалах ажил анх Говь-Алтай болон Завхан аймгаас эхэлсэн. Завхан аймгийн Дөрвөлжин сумын нутаг Хомын тал, Сээрийн нуруунд 2004-2005 онд 22 тахь нутагшуулсан юм. Энэ хугацаанд тахийн тоо толгой өсч, өнгөрсөн онд 89-д хүрээд байна. Орон нутгийн Тусгай хамгаалалттай 28 га газарт нутагшсан тахь ирэх онд зууд хүрэх ажээ.