Гацуур модыг хамгийн том гэгдэх талбайдаа залцгаадаг. Италид гэхэд л Рим дэх гэгээн Петрийн талбайд, Лондонд бол Трафальгарын талбайд, Нью-Йоркт Рокфеллерийн төвд, түүгээр ч барахгүй Рио-де-Жанейрод Лагоа нууранд гацуураа байрлуулдаг. Харин манайд нийслэлийн хотын төв болох Сүхбаатарын талбайд хамгийн том сүрлэг гацуур модоо засдаг уламжлалтай билээ.
Шинэ жилийн баярын бэлгэдэл болгож энэхүү ганган ногоон гацуурыг залдаг уламжлал нь үеэс үед дамжсаар олон зууныг ардаа үджээ. Төв талбайн гацуурны тухай гоёл чимэглэлийн багш Л.Зундуй хэлэхдээ “Улаанбаатар хотын хамгийн өндөр гацуурыг барихдаа төмөр арматураар угсарч, хиймэл ногоон гацуураар бүрхэнэ. Дараа нь хоёр гурван талаас нь хамжаад л гацуураа чимэглэж эхэлнэ дээ. Ингээд дунджаар 2-3 хоногийг гацуур угсрахад зарцуулна. Харин энэ жил олон төрлийн тоглоомон чимэглэлээр гоёсон. Гэхдээ чимэглэлүүдийн зарим нь алга болчихсон байдаг. Тиймээс тоглоомнуудаа сайн бэхэлж тавих хэрэгтэй. Гэсэн ч алга болох эсвэл хагалах зэргээс болж дараа жил нь дахиад л шинэ тоглоом авах хэрэгтэй болдог” хэмээв.

 Төв талбайд сүндэрлэх гацуурын өндөр нь 22 метр бөгөөд олон жилийн турш шинэ он гарах аз жаргалтай мөчийг хамтдаа хуваалцсан юм. Мөн энэхүү гацуурыг тойрон 800 ширхэг буюу 8000 метр урттай шар лед гэрлээр гоёдог.
Дэлхийн хамгийн өндөр гацуурыг 2009 онд Мехикогийн төв өргөн чөлөөнд босгосон бол, Арабын бүгд найрамдах Эмиратад 2010 онд 12 сая долларын үнэ бүхий цэвэр алтан бөмбөлгөөр гацуураа чимсэн байна. Гацуурын хэв загвар, түүний гоёл чимэглэлүүд улс орон бүрт өөр өөрсдийн гэсэн өнгө төрхийг ийнхүү бий болгодог.
Шинэ жилийн баяраар гацуур чимэглэн угтах болсон заншил нэгэн түүхээс улбаатай.

 Эрт дээр үед хүмүүс модонд сүнснүүд амьдардаг тул далдын хүчтэй гэж боддог байсан учраас янз бүрийн модыг чимэглэдэг заншилтай байжээ. Ингэхдээ тэд модыг алим, өндөг, самраар чимэглэж сүнснүүдийг аргаддаг байв. Түүнчлэн гацуур нь бусад моддын дотор ямагт онцгой байр эзэлж иржээ. Түүнийг амьдралын бэлгэдэл, үхэшгүй мөнхийн мод гэж үздэг байв. Гацуур мөнх ногоон байдаг болохоор түүнд ямар нэг ид шид нуугдсан гэж итгэжээ. Жишээлбэл, Грект гацуурыг амьд бүхний ашид мөнхийн ариун найдвар гэж үздэг байсан гэнэ. Домогт гардаг Трояны морийг ч гацуураар хийсэн гэж үзэж байв. Анх Францын Эльзаст 1605 онд гацуурыг чимэглэсэн аж. Түүхэн тэмдэглэлд дурдсанаар тэр үед цаасан сарнай, жигнэмэг, алим, ёотон, алтан мөнгөн саагаар чимэглэсэн гацуурыг баярт зориулан байрлуулдаг байсан гэнэ. Энэ гайхалтай санааг европчууд дахин тэр дор нь шүүрэн авсан байна. Анх гацуурыг зөвхөн чинээлэг айлууд л засдаг байжээ. Тухайн үед чимэглэсэн гацуурыг нэг үхрээр худалдаж авч байсан юм.