Хүүхдийн нүүр ам судлаач эмч З.Дөлсайханы цуврал зөвлөгөөг энэ дугаараас эхлэн уншигчдадаа хүргэхээр боллоо. Тэрбээр хүүхдийн шүдний эрүүл ахуйг хамгаалах ажилд голчлон анхаарлаа хандуулдаг учраас манай сониноор дамжуулан 14 хоног нэг удаа “Цахиурхан эмчийн зөвлөгөө”-г хүргэх юм.
Бид ам, хамрынхаа алиар нь ихэвчлэн амьсгалдаг бол. Мэдээж аль алинаар нь бид амьсгалж чадна. Хүн биеийн тамирын дасгал хөдөлгөөн хийх болон ярьж байхдаа хамар, амаараа зэрэг амьсгалдаг гэж үздэг. Харин тайван байх үедээ буюу зурагт үзэх, ном унших, явган алхах, тоглохдоо хамраараа ихэвчлэн амьсгалдаг. Хүний эрхтнүүдээс хамгийн их хүчилтөрөгч хэрэглэдэг нь ТАРХИ юм. Тэр бол удирдлагын төв. Хүчилтөрөгчийн хамгийн том эх үүсвэр бол бидний амьсгалах АГААР, түүнийг биед нэвтрүүлж байгаа гол эрхтэн нь ХАМАР юм. Гэтэл зарим хүүхэд тайван үедээ ч амаа хагас нээлттэй байлгаж, амаараа амьсгалдаг. Хамар битүү байх эсвэл ам тойрсон болон уруулын булчин сул хөгжсөнөөр ийм эмгэг бий болдог. Олон жилийн турш ам нь ангайдаг байсан хүний доод уруул гадагшаа дарвайж, хуурайшсан байдаг.

Амаар амьсгалахын дутагдалтай тал

•Амаар амьсгалах ХУГАЦАА богино. Тиймээс хүчилтөрөгчийн хэмжээ бага, уушгинд явагдах агаарын солилцоо гүйцэд үргэлжлэхгүй.
•Хүйтэн агаар шууд цагаан мөгөөрсөн хоолой, уушги руу ордог.
•Уушги чийглэг, дулаан эрхтэн бөгөөд амаар амьсгалахад хуурай агаар уушги руу орно.
•Агаарт байгаа тоос, хог, нян, вирус ямар нэгэн шүүлтүүргүйгээр шууд уушгинд очно.
Амаа удаан хугацаанд ангайж явсан хүүхдүүд зуйван царайтай, унтамхай, нуруу нь бөгтөр, анхаарал төвлөрөл муу, хэт хөдөлгөөнтэй байдаг. Тиймээс та бүхэн Японы эмч Казүоки Имайн бий болгосон уруулын эргэн тойрны булчин чангалах дасгалыг хийгээрэй.

эх сурвалж :"Ардчилал таймс" сонин