Жил бүрийн гуравдугаар сарын 22-нд “Дэлхийн усны өдөр”-ийг улс орнууд тэмдэглэж, ундны цэвэр усаа хэрхэн ариг гамтай хэрэглэх, нөөцийг арвижуулж, хамгаалах асуудлаар олон нийтийн анхаарлыг хандуулдаг уламжлалтай.  Одоогоос 27 жилийн өмнөөс буюу 1993 оноос хойш энэ өдрийг  тэмдэглэж ирсэн түүхтэй. Монгол Улс энэ жил "Усаа хайрлах, гамнах, устай зөв харьцах" уриатай тэмдэглэн өнгөрүүлэх болжээ. Монгол Улс цэвэр усны нөөцөөр дэлхийн 145 орноос 22-т жагсдаг бөгөөд усны нөөц багатай улс орны тоонд багтдаг. Монголчууд хэрэглээний усныхаа 80 гаруй хувийг гүний усаар  хангадаг. Монгол орны гүний усны нөөц нь экологийн хувьд эмзэг тогтоцтой, нөхөн сэргэх хугацаа нь хэдэн зуун жил үргэлжилдэг байна. Иймд нөхөн сэргээгдэх боломжтой гадаргын усыг түлхүү ашиглаж,  гүний усны нөөцөө хамгаалах нь Монгол Улсын эн тэргүүний зорилт юм. "Уур амьсгалын өөрчлөлтийн нөлөөллийг бид хамгийн түрүүнд уснаас мэдэж болно. Усны нөөцийг урьдчилан тооцоход бэрхшээлтэй болсон улс орон олон бий. Мөн зарим газруудад ган гачиг болсноор усны хомсдол ихсч хүмүүсийн эрүүл мэнд болон бүтээмжид сөргөөр нөлөөлж эхэлжээ. Ирэх жилүүдэд хүн бүрийг ундны ус болон ариутгах татуургын үйчилгээгээр хангах нь цаг уурын өөрчлөлтийг багасгахад чиглэсэн гол стратеги" гэж НҮБ-аас тодорхойлж байна. 

эх сурвалж :"Ардчилал таймс сонин"