ХХААХҮ-ийн сайд Ч.Улаан “Энэ жилийн мал тооллогоор 27.7 сая ямаа тоолуулсан. Ингээд ноолуурын гарцаар нь бодож үзэхэд энэ жил 10.2 мянган тонн ноолуур бэлтгэхээр байна. Үүнийг манай дотоодын үйлдвэрүүд бүрэн угааж, цэвэрлэх боломжтой. Харин 5200 мянган тонн ноолуур самнах бол 3000 тонн сүлжмэл эцсийн бүтээгдэхүүн бэлтгэх боломжтой аж. Сангийн яам, Хөгжлийн банктай зөвлөлдөөд 300 тэрбум төгрөгийн зээл гаргахаар болсон. Энэ жилийн хувьд ноолуур бэлтгэлийн зээлийг жилийн гурван хувийн хүүтэй олгоно. Үүний зөрүү 30 тэрбум төгрөгийг Засгийн газар үүрч байгаа” хэмээн мэдээллээ.
Манай улсад ноолуур бэлтгэх 20 гаруй үйлдвэр үйл ажиллагаа явуулж буйгаас
100 дээш тонн ноолуур бэлтгэх 10 үйлдвэр 100-110 төгрөгөөр ноолуур авна
50-100 тонн ноолуур бэлтгэх таван үйлдвэр 90-100 мянган төгрөгөөр ноолуур авна
10-50 тонн ноолуур бэлтгэх таван үйлдвэр 80-1000 мянган төгрөгөөр ноолуур авна гэсэн урьдчилсан мэдээлэл гараад байна.
Түүнчлэн манай улсын ноолуур бэлтгэх 20 гаруй үйлдвэрээс банкны зээлийн шалгуур хангаж байгаа гуравхан үйлдвэр байгаа аж. Бусад нь өнгөрсөн жилүүдэд авсан ноолуур бэлтгэсэн зээлээ төлж дуусаагүй байгаа буюу банкны муу түүхтэй болсон байна. Иймд үйлдвэрлэгч нарын барьцаа хөрөнгө хүрэхгүй байгаа учраас энэ жилийн бэлдэх ноолуурынх нь үнээр барьцаа хөрөнгө бүрдүүлэхээр болжээ. Аж ахуйн нэгжүүдэд зээл олгохдоо арилжааны банкуудад тусгай данс нээж, шууд малчдын дансанд орох зохицуулалт хийхээр болсон байна. Учир нь аж ахуйн нэгжүүд банканд зээлтэй, зориулалтын бусаар ашиглах зэрэг асуудал үүсч болзошгүй тул ийм арга хэмжээ авч байгаа хэмээн ХХААХҮЯ-наас мэдээллээ. Иймээс ноолуур бэлтгэх аж ахуйн нэгжүүдийн тусгай дансанд зээлийг байршуулж, ноолуур авсан малчны дансанд шууд шилжүүлэх юм. Өнөөдөр аймаг бүрт ноолуурын үнэ харилцан адилгүй байна. Аймаг бүр жишиг үнийг тогтоож, түүнийгээ үндэслэн зээлийн хэмжээгээ тогтоож байгаа юм. Сүүлийн гурван жилд ноолуур бэлтгэдэг үйлдвэрүүдэд Хөгжлийн банкнаас 212 тэрбум төгрөгийн зээл авсан мөртлөө өнөөдрийн байдлаар 90 тэрбум төгрөгийн зээл төлөгдөөгүй байна.