“Монголын зэс” компани “Монголиан коппер корпрейшн” ХХК “Эрдэнэт”-ийн 49 хувийг авсан 400 сая 270 мянган ам.долларын дийлэнх буюу 72.4 хувь нь төрөөс, 27.6 хувь нь Худалдаа хөгжлийн банкнаас гарсныг тогтоосон. Анхнаасаа “Эрдэнэт” үйлдвэрийн 49 хувийг хувийн компани өөрийн 100 хувийн хөрөнгөөрөө худалдаад авчихсан бол өөр хэрэг. Гэтэл төрөөс буюу улсыг их хэмжээний хохиролд учруулан байж ХХБ-ны Д.Эрдэнэбилэгийн хамаарал бүхий “Эрдэнэт”-ийн 49 хувийг эзэмшигч Ц.Пүрэвтүвшингийн “Монголиан коппер корпорейшн”  компани руу их хэмжээний мөнгө шилжиж байсан байдаг. “Эрдэнэт”-ийн 49 хувийг худалдан авсан санхүүгийн схем хэрхэн бүрдсэн талаар ЗГХЭГ-ын дарга Л.Оюун-Эрдэнэ 2019 онд хийсэн танилцуулгадаа "Монголиан коппер корпорейшн" ХХК “Эрдэнэт”-ийн 49 хувийг  “Ростек”-ээс 400 сая 270 мянган ам.доллараар худалдан авсан санхүүжилтийг нийт дөрвөн эх үүсвэрээр бүрдүүлсэн байна.

Нэгд, Сангийн яамнаас 183.6 тэрбум төгрөгийн вексель бичих замаар "Кью Эс си" ХХК-д шилжүүлсэн байна. Уг компанийн ТУЗ-ийн даргаар Д.Эрдэнэбилэг ажилладаг бөгөөд энэхүү компани нь Дарханы төмөрлөгийн үйлдвэрийн концессыг эзэмшдэг байна. Энэ компани вексель бичүүлж авсан эх үүсвэрээ дөрвөн компанид шилжүүлж, тус компаниуд нь "Монголиан коппер корпорейшн" компанийн гүйцэтгэх захирал Ц.Пүрэвтүвшингийн данс руу 2016 оны дөрөвдүгээр сарын 21-нд шилжүүлсэн байна.

Хоёрт, Монголбанкнаас 200 тэрбум төгрөгийг “Кью Эс Си” компани руу шилжүүлж, өрийн бичиг гаргасан байна. Зөвхөн энэ үйлдвэл Монголбанкны тухай хууль болон бусад хуулийг шууд зөрчиж байгаа юм. 

Гуравт, Хөгжлийн банкнаас 122.6 сая ам.долларыг “Кью Эс Си” компани болон Хөтөлийн цемент шохой үйлдвэр рүү шилжүүлжээ. Ингэхдээ 2014 онд Хөгжлийн банкнаас 71.3 сая долларыг “Кью Эс Си” компани руу, 2015 онд 51.3 сая долларыг Хөтөл рүү шилжүүлж авсан байсан.

Дөрөвт, Худалдаа хөгжлийн банк өөрийн эх үүсвэрээс 90.3 сая ам.долларын эх үүсвэрийг хамаарал бүхий дөрвөн компани руу шилжүүлж эх үүсвэрийг бүрдүүлсэн байна. Үндсэндээ “Эрдэнэт”-ийн 49 хувийг худалдаж авах санхүүгийн эх үүсвэрийн 72.4 хувийг төрөөс бүрдүүлж, 27.6 хувийг Худалдаа хөгжлийн эх үүсвэрээс бүрдүүлсэн байна хэмээн дурдаж байв.

Д.НАРАН