"Эрдэнэтийн 49", "Дарханы төмөрлөгийн үйлдвэр", "Хөтөлийн цемент шохой үйлдвэр"-тэй хэргийн шүүх хурлын урьдчилсан хэлэлцүүлэг маргааш Сүхбаатар дүүргийн эрүүгийн хэргийн анхан шатны шүүхэд болно. 

"Эрдэнэт үйлдвэр" ТӨХК-ийн ОХУ-ын эзэмших 49 хувийг хууль бусаар худалдаж авсан, “Монголиан коппер корпрейшн” ХХК-д давуу байдал бий болгосон, “Дархан төмөрлөгийн үйлдвэр” ТӨХК-ийн хөрөнгө оруулалтын болон концессын гэрээг байгуулахдаа “Кью Эс Си” ХХК-д давуу байдал бий болгосон, “Хөтөлийн Цемент шохой” ТӨХК-ийг хэт үнэгүйдүүлэн хувьчилсан хэрэгт 21 хүн, 2 хуулийн этгээдийг яллагдагчаар татсан билээ. 

Энэ хэрэгтэй холбогдуулан өнөөдөр УУХҮ-ийн дэд сайд асан О.Батнайрамдал мэдээлэл хийлээ. 

Тэрбээр "Сүүлийн 30 жил явсан хамгийн том луйврын схем бол Эрдэнэтийн 49%-ийг "Дарханы төмөрлөгийн үйлдвэр", "Цемент шохой" үйлдвэртэй хамт авах оролдлого байсан. Уг хэргийн шүүх хурлын урьдчилсан хэлэлцүүлэг маргааш болох тул олон нийтийн анхаарал ирэх ёстой гэж бодож байна. "Цемент шохой" ТӨХК-ийн төрд учруулсан нийт хохирол 660 тэрбум төгрөг. Хөгжлийн Банкны 61 сая ам.долларын зээл нь одоог хүртэл төлөгдөөгүй" гээд луйврын схем хэрхэн явагдсаныг тайлбарлав. 

"Цемент шохой" ТӨХК-ийн хувьд:

2011.01.12-нд тухайн үеийн Зам тээврийн хөгжлийн сайд Х.Баттулга ажлын хэсэг байгуулж, БЭЙЗМЕНТ ХХК (Компанийн эзэмшигч нь ХХБ-ны Д.Эрдэнэбилэг)-ийг байгуулсан. Ийнхүү цаасан дээрх компани Засгийн газартай хөрөнгө оруулалтын гэрээ байгуулсан.

2012.10.15-нд Хөгжлийн Банкнаас 61 сая ам.долларын зээл авсан.

2015 онд УИХ, Засгийн газраас УИХ-ын дарга З.Энхболд хувьчлах шийдвэр гаргасан. Ингэхдээ "Цемент шохой"-н хувьчлалыг хөрөнгө оруулагчид шууд гэрээгээр өг гэсэн чиглэл гаргасан.

2015.10.8-нд Төрийн өмчийн хорооноос хувьчилсан. Өөрөөр хэлбэл БЭЙЗМЕНТ ХХК-д хувьчлагдсан.

“Дарханы төмөрлөгийн үйлдвэр” ТӨХК-ийн тухайд:

2011.12.23-нд хөрөнгө оруулалтын гэрээ байгуулсан.

2013.09.06-нд Концессын жагсаалтад орсон.

2014.04.04-нд Концессын гэрээ байгуулсан

2015.09.07-нд концессын нөхцөлийг өөрчилсөн.

2016.02.01-нд Улсын төсвөөс 240 тэрбум төгрөгийн санхүүжилт олгосон. 30 жил хүчин төгөлдөр байх ёстой концессын гэрээг нэг жилийн дотор дэд бүтцээ барингуутаа илүү мөнгөний санхүүжилт авсан гэсэн үг.

“Дарханы төмөрлөгийн үйлдвэр”ТӨХК-ийн төрд учруулсан хохирол нь 1.2 их наяд төгрөг байна.

Эрдэнэт үйлдвэр, Дарханы төмөрлөгийн үйлдвэр, Хөтөлийн цемент шохойн үйлдвэр яагаад хамтдаа энэ хэргийн хохирогч болж байгаа вэ гэдгийг О.Батнайрамдал тайлбарлахдаа.. "Эрдэнэтийн 49 хувийг авах үйл ажиллагаа 2012-2016 оны хооронд болсон гэсэн үг.   Яагаад гэвэл цемент шохой үйлдвэрлэдэг эндээс гарч ирж байгаа шохой, Дарханы төмөрлөгөөс гарч ирж байгаа ган бөмбөлөг бүгдээрээ Эрдэнэт үйлдвэр дээр очиж нийлүүлэгдэж Эрдэнэт үйлдвэрийг тогтвортой үйл ажиллагаа явуулахад ханган нийлүүлэлтийг гнь хийдэг гэсэн үг. Тэгэхээр Цемент шохой, Дарханы төмөрлөг үйлдвэртэй нь  хамтад  нь авч байж Эрдэнэт үйлдвэрийг цаашдаа эзэмших боломжтой болно" гэж мэдээллээ. 

"Эрдэнэт үйлдвэр" ТӨҮГ-ын учруулсан хохирол нь олон нийтэд гарсан мэдээллээр 9.3 их наяд төгрөг байгаа юм.