Гадаад харилцааны сайд Б.Батцэцэг сүүлийн таван жилд олон өнгийн дээл сольж өмссөн гоё эмэгтэй гэдгээс өөр юу ч хийсэнгүй. Дэлхийд Монголыг таниулсан ямар ч эерэг мэдээ түгээсэнгүй. Түүнийг сайдаар ажиллах таван жилийн хугацаанд дэлхийн хэмжээний том зочин Монголд айлчилж дэлхийн хэмжээний хөрөнгө оруулалт, гэрээ ярьсангүй. Ч.Сайханбилэг, С.Баярын үед хөдөлгөсөн Оюу толгой л гуравдагч хөршийн том гэрээ болж, дэлхийд Монголын нүүрийг талхалж байна.

У.Хүрэлсүх 2020 оны сонгуулийн дараа Засгийн газраа эмхлэн байгуулахад Б.Батцэцэгийг Гадаад харилцааны сайдаар дэвшүүлэн томилоход манай улсын гадаад харилцаа тийм ч уруудчихаагүй байв. Улмаар 2021 онд Л.Оюун-Эрдэнийн Засгийн газарт түүнийг Гадаад харилцааны сайдаар томилоход гадны хөрөнгө оруулалтаас эхлээд олон зүйл дээр гацаа үүсчихсэн байлаа. 2024 онд Л.Оюун-Эрдэнэ дахин засгаа эмхлэн байгуулахад тэр мөн л Гадаад харилцааны сайдад тогтож үлдсэн.

Үр дүнд нь Монгол Улсын гадаад харилцаа зэвэрч, гадны хөрөнгө оруулалтын урсгал нэгэнт тасарчихсан. Тиймдээ ч олон төсөл хөтөлбөр, мега төсөл хэрэгжүүлнэ гэж мэдэгдсэн Л.Оюун-Эрдэнэд тэр нэрмээс л болж байв. Гадаад харилцааны сайд нь эдийн засгийн чиглэлээр хүчирхэг гүрнүүд буюу гуравдагч хөршүүдтэй огц харилцаж чадахгүй байна гэдэгт Засгийн газарт маш том саад тээг, уяа гэдгийг хэн ч хүлээн зөвшөөрнө.

Өдгөө тэр Г.Занданшатарын танхимд Гадаад харилцааны сайдаар ажиллаж буй. Яг л өмнөх шиг гадаадын хөрөнгө оруулалт тасарсан хэвээр байх нь тодорхой. Гуравдагч хөршийн ямар ч том зочин гийчингүй, баахан буурай орон тойрсон төрийн айлчлалууд яг л өнгөрсөн таван жилийнх шиг цуварна. Тэгэхээр түүнийг Гадаад харилцааны сайд хэвээр байлгасаар байвал Г.Занданшатар булшныхаа нүхийг өөрөө ухаж байна л гэсэн үг.