Хөгжлийн бэрхшээлтэй хүүхэдтэй эцэг эхийн холбооноос хөгжлийн бэрхшээлтэй хүүхдүүдийг жирийн сургуульд сургахад санхүүжилтийг шийдэх шаардлагатай, “Бүх хүүхдүүдэд боловсролыг тэгш хүртээх, соён гэгээрүүлэх үйлсэд бидэнтэй нэгдээч” хэмээн уриалж мэдээлэл хийлээ. 2018 оны арваннэгдүгээр сард Хөдөлмөр, нийгмийн хамгааллын сайд, Боловсрол, соёл, шинжлэх ухаан, спортын сайд, Эрүүл мэндийн сайдын хамтарсан тушаалаар хөгжлийн бэрхшээлтэй хүүхэд бусад хүүхдийн хамт ердийн сургуульд тэгш хамрагдан сурах эрхийг баталгаажуулсан. Гэвч хэрэгжилт хангалтгүй, эрх нь зөрчигдөж, тулгамдсан асуудал ч олон байна. Хөгжлийн бэрхшээлтэй хүүхдүүдийг жирийн сургуульд сургахаар болсон нь сайшаалтай ч орчныг нь бүрдүүлэхийн тулд тусгай мэргэжлийн багш ажиллуулах санхүүжилтийг шийдэх шаардлагатай. Мөн жирийн сургуульд хөгжлийн бэрхшээлтэй хүүхэд сурч эхлэхэд эцэг, эхчүүд санаатай болон санамсаргүй байдлаар тэднийг ялгаварлан гадуурхсан хандлага ч гаргадаг. Иймээс сайдын тушаалыг хэрэгжүүлэхийн тулд ерөнхий боловсролын сургуулиудад Дэмжлэгийн зөвлөл байгуулан ажиллах шаардлагатай байна. Гэтэл хэчнээн ерөнхий боловсролын сургуульд байгуулагдсан нь тодорхойгүй байна. Бидэнд олдсон мэдээллээр Хөвсгөл аймаг, Баянгол дүүрэгт байгуулагдсан байгаа. Одоогийн байдлаар буюу 2019 оны зургадугаар сарын судалгаагаар 1685 хөгжлийн бэршээлтэй хүүхэд сургуульд хамрагдаагүй байна.