Долоон баллаас дээш газар хөдлөвөл Улаанбаатар хотын барилга байшингийн 50-аас дээш хувь нь нурна гэсэн үг байдаг. Энэ үг үнэний ортой ч чанаргүй барилга сараар биш өдөр өдрөөр нэмэгдсээр буй. Учир нь барилгын салбар тэр чигтээ хувьд шилжсэн сүүлийн 20 гаруй түүнээс өмнөх жилүүдэд ч манай улсад аюултай түвшинд хүрэхүйц газар хөдөлж байгаагүй юм. Тийм учраас газар хөдлөлт гэдгийг улаанбаатарчууд үндсэндээ ой тойноосоо арчсан гэхэд болно. Гэтэл 2005 оноос хойш манай улсад газар хөдлөлтийн давтамж улам бүр олширч, энэ хэрээр магнитуд нь нэмэгдэж буй аж. Гурван жилийн өмнөхөн гэхэд 27849 удаагийн газар хөдлөлт бүртгэгдсэн нь өмнөх жилтэй харьцуулахад 30 хувь ихэссэн тоо. Үүнээс 3.5 баллаас дээш хүчтэй 47 удаагийн газар хөдлөлт бүртгэгдсэн бөгөөд хүмүүст мэдрэгдсэн нь 16 тохиолдол.

Улаанбаатар хотод 2000 оноос өмнө баригдсан нийт 1937 барилга байдаг гэнэ. Үүнд мэргэжлийн байгууллагууд шинжилгээ хийж дүгнэлт гаргажээ. Дээрх барилгуудын 658-д нь газар хөдлөлтийн эрсдэлийн дүгнэлт гаргасан байна. Орон сууцнуудын хувьд газар хөдлөлтөд тэсвэртэй 182, хүчитгэх шаардлагатай 93, газар хөдлөлтөд тэсвэргүй 354 барилга байгаагаас мэргэжлийн хяналтын газрын дүгнэлтээр 234-ийг нь ашиглахыг хоригложээ.