Ардчилсан намаас “Ардчилсан хувьсгалын 30 жил”-ийн ойг тохиолдуулан “Олон Улсын Ардчиллын өдөр”-ийг энэ сарын 13-ны өдөр Сүхбаатарын талбайд “Savedemocracy2020” буюу “Ардчиллаа хамгаалъя” нэртэйгээр тэмдэглэн өнгөрүүлэх гэж байна. НҮБ-ын Ерөнхий ассамблейгээс 2007 оноос хойш жил бүрийн есдүгээр сарын 15-ны өдрийг Олон улсын ардчиллын өдөр болгон тэмдэглэхээр тогтсон. Ардчилсан намын санаачилгаар энэ өдрийг манай улс анх удаагаа ач холбогдол үр дүнтэйгээр тэмдэглэн өнгөрүүлэхээр зэхэж байна. Олон Улсын Ардчиллын өдрийг тэмдэглэн өнгөрүүлэх “Ардчилсан хувьсгалын 30 жил”-ийн ойн арга хэмжээ “Монгол Улс Ардчиллын замаар-30 жил” онол практикийн бага хурлаар эхэлнэ. Уг онол практикийн хуралд улс төрийн намууд оролцоно. Мөн Сүхбаатарын талбайд Олон улсын Ардчиллын өдөрт зориулсан нээлттэй өдөрлөг болох бөгөөд үүнд гэрэл зургийн үзэсгэлэн, ардчиллын түүхийг өгүүлсэн боть цуврал номны нээлт, урлагийн тоглолт, фүүд экспо, ховор автомашины үзэсгэлэн гэх мэт олон арга хэмжээнүүд болно. НҮБ, олон улсын байгууллага, дипломат төлөөлөгчийн газрын гадаад, дотоодын хүндэт олон зочид төлөөлөгчид урилгаар оролцоно. Түүнчлэн “Savedemocracy2020“ баярын шоу арга хэмжээг зохион байгуулах бөгөөд лазер гэрлэн дүрсний гайхамшгийг харуулсан хамгийн анхны томоохон шоу, урлагийн тоглолтыг зохион байгуулна гэдгийг зохион байгуулагчид онцолж байна. 

Монгол Улс 1990 онд ардчилалд шилжсэнээс хойш өдгөө 30 дахь жилийнхээ ойтой золгож буй ардчилсан улс дэлхий нийтээр хүлээн зөвшөөрөгдөн, бүс нутагтаа ардчиллыг амжилттай бойжуулан хөгжүүлж буй загвар орон гэж үнэлэгдэж байна. Тэр тусмаа ...хоёр хөршийн дунд ардчилсан үзэл, эрх чөлөөг иргэн хүн бүр эдэлж, Ази дахь үлгэр жишээ ардчилсан улс гэдгээрээ дэлхий нийтийн анхаарлын төвд байдаг.
Олон улсын ардчиллын өдөр нь зөвхөн ардчилсан тодотголтой намын баяр биш, ардчиллын замаар замнаж буй тухайн улс, дэлхий нийтийн хүрээнд ардчиллын ололт амжилт, алдаа оноогоо үнэлэн цэгнэдэг өдөр. Ийн Монгол Улс Олон улсын ардчиллын өдрийг анх удаагаа тэмдэглэн өнгөрүүлснээр олон улсад ач холбогдлоо улам өргөж байгаа юм.