Нийслэлийн төв талбайн урд хэсэгт хагас саран хэлбэр оруулан эрийтэл нь гурав  давхарлаж өрсөн чингэлгүүд хүмүүсийн анхаарлыг татаж сошиалаар хэлэлцэх сэдэв болов. Үүнийг сурвалжилбал гэрлэн үзүүлбэрийн  тайз засалтын ажил  аж.   Өндөр нь  12, өргөн нь 140 метр бөгөөд Монголын хамгийн том тайзыг засах гэж байгаа юм байна.
НҮБ-аас есдүгээр сарын 13-ныг Олон улсын ардчилалын өдөр хэмээн зарласан байдаг. Ингээд эл өдрийг дэлхийн улс орны Засгийн газрууд ард иргэдэдээ ардчилалд идэвхтэй, утга учиртай оролцож эрхээ хүндэтгэхийг уриалан тэмдэглэн өнгөрүүлэх санаачилга гаргажээ. Ардчилсан нам энэ өдрийг Монгол Улсад Ардчилсан хувьсгал ялсаны 30 жилийн ойтой хамт тэмдэглэхээр бэлтгэл ажлаа хангаж буй аж. Олон улсын Ардчиллын өдөр буюу есдүгээр сарын 13-ны баасан гарагт болох лазер гэрлийн шоуг “LIGHT UP MONGOLIA” хэмээн нэрлэсэн байна. 

Үүнээс гадна урлаг, соёлын олон арга хэмжээ өрнөх юм. Мөн хуучны ховор автомашины үзэсгэлэн, фүүд фестиваль, ховор зургийн үзэсгэлэн, Ардчиллын түүхийн боть номын нээлт зэрэг арга хэмжээг олон нийтэд толилуулахаар бэлтгэжээ.Өнөөдөр 35 хүртлэх насны залуус Монгол Улсад Ардчилсан хувьсгал хэрхэн өрнөсөн талаар төдийлөн ойлголтгүй явдаг гэхэд хилсдэхгүй биз ээ.
Иймд монголчууд ардчилал, хүний эрх, үг хэлэх эрх чөлөөгөө олж авахын төлөө хэрхэн тэмцсэнийг гэрэл ашиглаж, том 3D дэлгэц дээр харуулах юм. Нэг ёсондоо ардчилсан хувьсгалд оролцсон ахмад зүтгэлтнүүд, ардчиллын алтан хараацайнууд бидэнд болон хойч үедээ юу захиж үлдээхийг хичээж ирсэнийг орчин үеийн техник, технологи ашиглан тод томруун харуулах юм байна. Өөрөөр хэлбэл Ардчилсан төртэй Монгол Улсын өнгөрсөн 30 жилийн түүхийг өгүүлнэ гэсэн үг. Үүгээр ч зогсохгүй ирэх 30 жилд дижитал хиймэл оюун ухаанд суурилсан ирээдүйг хамтдаа бий болгохын төлөө хамтран зүтгэхийг залууст уриалсан үйл явдал болох аж. Нэг ёсондоо Монгол Улсын өнгөрсөн 30 жилийн түүх, ирээдүйн 30 жилийн хөгжлийг энэ лазер гэрлийн шоунаас харах нь.

Гэрлийн шоуны дуу хөгжим, чимэг холбоосыг Монгол Улсын филармони болон Дуурь бүжгийн эрдмийн театрын уран бүтээлчид, удирдаач Б.Анартай хамтран газар дээр нь шууд тоглоно. Үүний зэрэгцээ монголын шилдэг ресторанууд төв талбайд халуун хоол, зоогоор үйлчилэх юм. Энэ намрын хамгийн нүсэр, шинэлэг шийдэлтэй, олон нийтэд нээлттэй, үнэ төлбөргүй лазер гэрлийн шоу баасан гарагт 19 цагт эхлэхээр бэлтгэлээ базааж байна. Харин тайз засалт нь өчигдөр сошиал ертөнцөд “Юу болох гээд Д.Сүхбаатарын талбайд баахан чингэлэг өрчихөв” гэсэн оньсого таавар өрнүүлсэн юм. Эргэн санавал хэдэн жилийн өмнө Засгийн газрын ордны өмнөх Их эзэн Чингис хааны суумал хөшөөг босгож гэрлийн шоуны гайхамшигийг монголчуудад анх мэдрүүлж байсан удаатай. Тэр уран бүтээлчид Олон улсын ардчиллын өдөр, Монгол Улсад ардчилсан хувьсгал ялсаны 30 жилийн ойд зориулсан лазер гэрлийн шоуг хийхээр бэлтгэлээ базааж байгаа аж. Дашрамд дурдхад дэлхийн улс орнууд ардчиллыг дэмжиж, энэ замаар хөгжихийг өдгөө чухалчилж байгаа юм. Жишээлбэл, 1970 онд 35 улс л ардчилсан замаар хөгжих үндэс сууриа тавьсан байж. Тэгвэл өдгөө дэлхийн 120 гаруй улс уг замыг сонгожээ. Тэр дундаа Монгол Улс ардчилсан хувьсгалыг Ази тивдээ тайван замаар хийсэн, түүнийгээ хамгаалж хөгжлүүлэхийн төлөө тууштай зүтгэдэг хэмээн түүхч, судлаачид өнөөдөр дүгнэж байна.

Монголд ардчилсан хувьсгал тайван замаар өрнөхөд БНМАУ-ын АИХ-ын Тэргүүлэгчдийн дарга, МАХН-ын Төв Хорооны Ерөнхий нарийн бичгийн дарга Улс Төрийн Товчооны гишүүн Ж.Батмөнх, Монголын Ардчилсан Холбооны Ерөнхий зохицуулагч С.Зориг нар чухал үүрэг гүйцэтгэсэн хэмээн үздэг. Учир нь Ж.Батмөнх “Ард түмний тайван тэмцлийн эсрэг хэрхэвч хүч хэрэглэж болохгүй гэсэн хатуу байр суурьтай байсан нь ардчилсан хувьсгалыг нэг ч хүний хамраас цус гаргалгүй тайван өрнөхөд чухал нөлөө үзүүлсэн” хэмээн түүхчид үзэж байгаа юм. Тэгвэл С.Зориг өндөр боловсролтой төлөв төвшин зантай, аливаа хурцадмал асуудалд хүлээцтэй ханддаг, зөвшилцлийг эрхэмлэдэг хүн байсан нь ардчилсан хувьсгалыг тайван замаар хийж амжилтад хүрхэд чухал үүрэг гүйцэтгэсэн гэдэг.