"Үйлчилгээний байгууллагууд бараа бүтээгдэхүүний талаар тайлбарлаж өгдөггүй гэсэн гомдол ахмадуудаас их ирдэг" хэмээн ШӨХТГ-аас өчигдөр мэдээлэл хийхдээ онцолсон юм. Үйлдвэрлэгч болон худалдагчийн буруутай үйл ажиллагаанаас учирсан гэм хорыг нөхөн төлүүлэх, хэрэглээний соёл эзэмших, сурах, үйлдвэрлэгч, гүйцэтгэгчид хэрэглэгчийн шаардлагыг биелүүлээгүй бол шүүхэд нэхэмжлэл гаргах, зохих чанар, тоо хэмжээ аюулгүйн шаардлагыг хангасан бараа бүтээгдэхүүн хэрэглэх, тухайн барааны талаар үнэн зөв мэдээллийг авч, сонголт хийх эрхтэй хэдий ч Хэрэглэгчийн мэдээллийн төвд ахмад настнуудаас аливаа бараа бүтээгдэхүүний талаар үйлчилгээний байгууллагууд тайлбарлаж өгдөггүй гэсэн гомдол их ирэх болсон. Тиймээс энэ сарын 10-наас аравдугаар сарын таван хүртэл “Ахмад настан хэрэглэгч” аяныг эхлүүлж байгаа бөгөөд тус аяны хүрээнд ахмад настнуудын эрх, үйлчилгээний газруудаар үйлчлүүлэхэд, болон бусад хэлбэрээр зөрчигдөж байгаа эсэхийг шалгахаар болсон гэдгээ ШӨХТГ-ийн Хэрэглэгчийн эрхийг хамгаалах газрын дарга Ш.Цэрэндулам мэдэгдлээ. Тэрээр ярихдаа, "Монгол Улсын нийт хүн амын 6.7 хувь буюу 333 мянга орчим нь ахмад настан. Түүнээс 133 мянган нь нийслэл хотод оршин сууж байна. Энэ утгаараа тус аяны хүрээнд НЗДТГ болон Нийслэлийн хэрэглэгчийн эрхийг хамгаалах салбар зөвлөл, ААН-үүдтэй нягт хамтран ажиллах юм. Цаашид ахмад настнуудад хэрэглэгчийн эрхийг хамгаалах хууль тогтоомжийн талаар мэдээлэл өгөх, “Ахмад настан хэрэглэгч” гэсэн сэдэвчилсэн хэлэлцүүлгийг зохион байгуулж, холбогдох яамдын түвшинд ахмад настануудад тулгардаг амралт, сувиллын хүртээмжтэй холбоотой болон Эрүүл мэндийн тусламж үйлчилгээ, шүдний протезтэй холбоотой гэх мэт олон асуудлын хүрээнд тодорхой хяналт шалгалтын ажлуудыг зохион байгуулна. Мөн эрүүл мэндийн даатгалаар ахмад настанд эмийн үйлчилгээ хүргэж чадаж байгаа эсэх болон нийтийн тээврээр үнэ төлбөргүй зорчих эрх нь хэрэгжиж байгаа эсэхэд шалгалт хийнэ” гэсэн юм. Ахмад настанууд гар утас худалдан авахад түүний талаар тодорхой тайлбар хэлдэггүй. Энэ байдлаас улбаалан тухайн иргэн худалдаж авсан бараагаа буцаах нь элбэг. Тийм учраас худалдаа, үйлчилгээний байгууллагууд Ахмад настны тухай хууль болон Хэрэглэгчийн эрхийг хамгаалах тухай хуулийг хэрэгжүүлэх нь чухал байна.Ахмад настны тухай хуулийн 12.6-д Худалдаа, тээвэр, холбоо, эрүүл мэнд, нийтийн үйлчилгээний газар ахмад настанд тэргүүн ээлжид үйлчилнэ гэж заасан байдаг.

Мөн тус хуулийн 12.7-д Төрийн болон төрийн бус байгууллага, аж ахуйн нэгж нь автобусны зогсоол, төмөр замын өртөө, нисэх буудал, худалдаа, үйлчилгээний төв, цэцэрлэгт хүрээлэн, сүм, хийд болон нийтийн үйлчилгээний бусад газар ахмад настанд зориулсан тусгайлан тоноглосон суудал, тавцан, гарц, шат, угаагуур, суултуур зэргийг хүрэлцээтэй хэмжээгээр байрлуулах арга хэмжээ авахыг тусгасан байдаг. Тиймээс Монголын ахмадын холбоо, Эрүүл мэндийн яам, Зам тээвэр, хөгжлийн яам, Хөдөлмөр, нийгмийн хамгааллын яам зэрэг бусад байгууллагын хэрэглэгчийн эрхийг хамгаалах салбар зөвлөлүүд нэгдсэн журмаар ахмадуудад чиглэсэн сургалт зохион байгуулж, гарын авлага гаргахаар ажиллаж байна” гэв.
ШӨХТГ-т зуны улиралд аялал жуулчлалын үйлчилгээтэй холбоотой гомдол олон ирсэн байна. Аялал жуулчлалын үйлчилгээ нь үйлчлүүлэгчийн сэтгэлд хүрэхгүй байгаа тул төлбөрийн тодорхой хувийг нэхэмжилсэн тохиолдол гарсан байна. Энэ нь аялал жуулчлалын компани мэдээллээ тодорхой өгөөгүйтэй холбоотой гэнэ.
Мөн СӨХ-той холбоотой гомдолууд ч олон иржээ. Тухайлбал, СӨХ-д зөвшөөрөл өгч буй төрийн байгууллагуудтай холбоотой ажиллаж байгаа ч, хариуцлага тооцох хууль тодорхой бус байгаа аж. ШӨХТГ-ийн Хэрэглэгчийн эрхийг хамгаалах газрын дарга Ш.Цэрэндулам хэлэхдээ “Харилцаа холбооны зохицуулах хороо хариуцлагагүй ажиллаж байна. Бид өнгөрсөн хугацаанд "Mobicom", "Unitel"-д шалгалт хийсэн. Гэнэт үйлчилгээндээ өөрчлөлт оруулдаг, Data багцаа, үнээ өөрчилдөг зэрэг зөрчил их гарлаа. Эдгээрт зөрчлийн хэрэг үүсгэж, холбогдох торгуулийг ногдуулсан. ХХЗХ энэ асуудлыг дахин гаргахгүй байхад анхаарал тавьж байгаа гэж найдаж байна” гэв.

Мэдээлэл өгсний дараа сэтгүүлчдийн асуултад хариуллаа.

-Банкн иргэдийн эрхийг зөрчдөг. Үүнд шалгалт хийсэн үү?
-Банкны асуудлыг Монголбанк зохицуулах үүрэгтэй. Энэ үүргээ биелүүлэхгүй байгаа тохиолдолд иргэд манайд ханддаг. Энэ тохиолдолд бид гомдлыг барагдуулахыг шаардсан тодорхой хугацаатай бичгийг тухайн байгууллагад хүргүүлдэг.
-Эрчим хүчний тарифыг иргэдэд мэдэгдэлгүйгээр нэмсэнд шалгалт хийсэн үү?
-Эрчим хүчний үнийг нэмэх талаарх саналыг Засгийн газрын хэрэг эрхлэх газар манайхаас асуусан. Бид эрчим хүчний үнэ тарифыг яагаад нэмж болохгүй талаарх гаргалгааг Засгийн газрын хэрэг эрхлэх газарт хүргүүлсэн.
-Чанаргүй шатахууны асуудлаас эхлээд хэрэглэгчдийн эрхийг хамгаалж чадаагүй олон тохиолдол байна. ШӨХТГ хэрэглэгчдийн эрхийг хамгаалж чадахгүй байна. Татан буугдсан нь дээр биш үү?
-Манайх ердөө долоон байцаагчтай. Долоон байцаагч бүх гомдол дээр ажиллахад хүрэлцдэггүй. Эрчим хүч, шатахуунтай холбоотой асуудалд удаа дараа шалгалт хийсэн. Чанарын шаардлага хангаагүй шатахуун борлуулсан газруудын асуудлыг шүүхээр шийдвэрлээд явж байна