Улс төрийн хэлмэгдэгсдийн дурсгалын өдрийг тохиолдуулан Москва хотын баруун урд дүүрэгт байрлах ЗХУ-ын Дотоод хэргийн комисариатын нууц обьект байсан “Коммунарка” хэмээх газар хилс хэргээр буудуулсан монголчуудын дурсгалыг хүндэтгэн босгосон цогцолбор хөшөөнд цэцэг өргөж, хүндэтгэл үзүүлжээ. Монголчуудын дурсгалын хөшөөнд хүндэтгэл үзүүлэх ёслолд ЭСЯ-ны Элчин зөвлөх Д.Галсандондог, ЭСЯ-ны ажилтнууд, Монгол Улсын аж ахуйн нэгж, байгууллагуудын Москва хот дахь төлөөлөгчдийн газрын ажилтнууд, оюутан сурагчид, монгол иргэд оролцсон байна.
Энэхүү газар 1920 оны сүүлчээс ЗХУ-ын Дотоод хэргийн ардын комисариатын газрын дарга Г.Г.Ягодагийн хувийн зуслан нь байжээ. Энд 1937 оны есдүгээр сарын 2-ноос 1941 оны аравдугаар сарын 16-ны хооронд хилс хэргээр буудуулан хороогдсон хүмүүсийг бөөнөөр нь булшилсан байна.
“Коммунарка”-д 1938 оны аравдугаар сарын дунд хүртэл хэлмэгдэгсдийг бөөнөөр нь буудан хороож байжээ. Дэлхийн II дайн эхэлсний дараа буюу 1941 оны долдугаар сарын 27-30-нд 513 хүнийг буудан хороосон байна. Москвагийнхны хувьд хамгийн эмгэнэлтэй өдөр 1941 оны аравдугаар сарын 16-нд 220 хүнийг буудан хороож байжээ” гэж тус газрын хашаан доторх самбарт бичсэн байдаг.
Эндэхийн хөрсөн дор нийт 60 гаруй үндэстэн ястан түүний дотор 400 гаруй монгол хүн нойрсож байгаа аж.