УИХ-ын сонгуулиар 65 суудал авсан МАН 2016 оны долдугаар сарын 30-нд Ж.Эрдэнэбатын тэргүүлсэн  “Мэргэжлийн” хэмээн тодотголтой Засгийн газрыг томилсон. Гэвч МАН-ын дотоод зөрчил, эрх мэдлийн төлөөх тэмцэл ширүүсч  1.1 жилийн дараа буюу  2017 оны есдүгээр сарын 7-ны өдөр УИХ-ын ээлжит бус чуулганаар огцруулсан билээ.  Гэвч У.Хүрэлсүхийн Засгийн газар Жижиг дунд үйлдвэрийг хөгжүүлэх сангийн мөнгийг УИХ-ын гишүүд, эрх мэдэлтэн, албан тушаалтнуудад хувааж өгсөн, эдийн засгийн өсөлт саарч бараа бүтээгдэхүүний үнэ өссөн зэрэг шалтгаанаар огцрох дээрээ тулсан юм. Учир нь УИХ дахь МАН-ын бүлгийн 27 гишүүн гарын үсэг зурж Төрийн байгуулалтын байнгын хорооны хуралдаанаар огцруулах нь зүйтэй гэж үзсэн байдаг. Харин УИХ-ын нэгдсэн чуулганаар уг асуудлыг хэлэлцэх үед тэсч үлдсэн. МАН-ын энэ эрх мэдлийн төлөөх тулааны золиосонд иргэдийн аж амьдрал, түрийвч дэх хэдэн төгрөг үрэгдсэн. Үрэгдсээр ч байна. Засгийн газар ч үнийн хөөрөгдлийг дарж чадаагүй. Ямар нэг арга хэмжээ ч аваагүй билээ. Ийм учраас У.Хүрэлсүхийн Засгийн газрын ажиллаж эхэлснээс хойш  эдийн засгийн өсөлт өмнөхөөсөө саарч, шатахууны үнэ өсч, төгрөгийн ханш огцом суларч, ард иргэдийн нуруун дээр хүнд ачаа болон бууж ирсэн юм. Тухайлбал, 2017 оны долдугаар сард нэг ам.доллар 2352 төгрөгтэй тэнцэж байв. Харин өнөөдөр 2667 төгрөгт хүрлээ. Мөн монголчуудын хамгийн их хэрэглэдэг юанийн ханш  тухайн үед 346 төгрөг байсан бол эдүгээ 373 төгрөгтэй тэнцэж байгаа юм. Ингээд дараах хүснэгт, графикаас өргөн хэрэглээний бараа бүтээгдэхүүн, хүнсний үнэ хэрхэн нэмэгдсэнийг харж болно.