Улсын драмын эрдмийн театр Улаанбаатар хот үүсгэн байгуулсны 380 жилийн ойг угтан  “Монгол жүжгийн өдрүүд” тоглолтоо “Гэгээн муза” наадмын найман номинацийн зургааг хүртсэн “Тэнгэрийн хүү” жүжгээр эхлүүллээ.
Жүжгийн нээлт өнгөрсөн бямба гарагт болж Модун Шаньюй хааны дүрийг УДЭТ-ын жүжигчин Г.Алтангэрэл тайзнаа амилууллаа. Тэрбээр Ардын жүжигчин Б.Мөнхдорж гуайн шавь бөгөөд 2011 онд СУИС-ийг төгсөх жилдээ дээрх жүжгийн аравтын баатруудын нэгэнд сонгогдон тоглож байсан түүхтэй. Мөн УДЭТ-ын сонгодог, үндэсний, орчин үеийн, хүүхдийн гээд 30 гаруй жүжгийн гол ба туслах дүрүүдийг бүтээж театрын урлагт өөрийн гэсэн орон зайг хэдийнээ бий болгоод амжжээ.
Дашрамд, Улсын драмын эрдмийн театр 2019-2020 оны үзвэрийн  хөтөлбөрөө гаргаад байна. УДЭТ-ын тайзнаа арав, арваннэгдүгээр сард “Би эндээс явахгүй”, “Жаргаагүй нар”, “Надтай үлдээч”, “Хайрын виз”, “Тамгагүй төр”, “Бүсгүйн зурвас”, “Тэнгэрийн хүү” зэрэг жүжиг үзэгчдэд  хүрэх юм.
Харин дээрх жүжгүүдийг үзэхдээ монгол үндэсний хувцсаараа гоёж ирэхийг тус театраас уриалсан байна.