Нийслэлийн Онцгой байдлын газар, Мэргэжлийн хяналтын газартай хамтран нийслэл, дүүргийн цагдаагийн газар, хэлтсийн 730 алба хаагч, 130 олон нийтийн цагдаа, урамшилт эргүүл ажиллаж 10 мянга орчим айл өрх, 213 аж ахуйн нэгж, байгууллагын уурын зуух, 30 сайжруулсан шахмал түлш борлуулах дундын бөөний төв, 305 түлш борлуулах цэгийн үйл ажиллагаанд хяналт, шалгалт хийв. Шалгалтаар нийслэл хотын шалган нэвтрүүлэх дөрвөн постоор хууль бусаар түүхий нүүрс тээвэрлэсэн, түүхий нүүрс хэрэглэсэн, борлуулсан, бусад утаа үүсгэгч зүйл шатааж хэрэглэсэн зэрэг нийт 72 зөрчил илрүүлж 148 тонн түүхий нүүрсийг хурааж Мэргэжлийн хяналтын байгууллагад харьяаллын дагуу шилжүүлсэн байна. Мөн Сүхбаатар дүүргийн 16 дугаар хороонд үйл ажиллагаа явуулдаг нэгэн байгууллагын хашаанд 15 тонн орчим түүхий нүүрс хадгалж байсныг цагдаагийн газрын алба хаагчид явган эргүүлийн үүрэг гүйцэтгэхдээ илрүүлжээ. Шалгалтаар хураасан түүхий нүүрсийг Мэргэжлийн хяналтын хэлтэст шилжүүлэн өгчээ.

Түүхий нүүрсийг Амгалан дулааны станцад харин тээврийн хэрэгслийг Баянгол, Баянзүрх, Сонгинохайрхан, Сүхбаатар, Чингэлтэй, Хан-Уул дүүргийн тээврийн хэрэгсэл түр саатуулах байранд төвлөрүүлэн журамлах юм.
Улаанбаатар хотын Захирагч С.Амарсайхан түүхий нүүрсний тээвэрлэлт, хэрэглээнд хяналт тавих тухай захирамж гаргасан. Захирамжид Улаанбаатарын агаарын чанарыг сайжруулах, иргэдийн эрүүл аюулгүй орчинд амьдрах нөхцөлийг хангах, нийслэлийн агаарын чанарын хоёр, гуравдугаар бүсэд түүхий нүүрс ашиглахыг хориглох зорилгоор ирэх оны дөрөвдүгээр сарын 1 хүртэл хяналт шалгалт зохион байгуулахаар тусгажээ.

Б.Мөнхбайгаль