Хурим бол хүний амьдралын хамгийн гайхалтай дурсамжит үйл явдал, нандин мөчүүдийн нэг билээ. Магадгүй амьдралд ганц тохиох тэр л өдөр зүрх сэтгэлд үүрд мөнхлөгдөж үлддэг биз ээ.

Нийслэлийн 380 жилийн ойг тохиолдуулан “Нийслэлийн иргэн” өдөрлөгийн хүрээнд арваас дээш жил ханилсан 38 хосын гэрлэх ёслолын үйл ажиллагаа болов.
Гэрлэх ёслолд Нийслэлийн есөн дүүрэг тус бүрээс гурван хос, Нийслэлийн Засаг даргын тамгын газраас гурван хос, Нийслэлийн хот тохижилтын газраас найман хос нийт 38 хос оролцсон юм. Энэхүү үйл ажиллагаа нь нийгмийн хүрээнд баталгаат гэр бүлийг нэмэгдүүлэх, залуу гэр бүлд үлгэрлэж үзүүлэх, хамтын амьдралын үнэ цэнийг мэдрүүлэх зорилготой зохион байгуулагдаа.

 

“Энэ жил Нийслэл хот байгуулагдсаны 380 жилийн ой тохиож байна. Ойн хүрээнд Гэрлэх ёслолын ордон долоо дахь жилдээ “Нийслэлийн иргэн” сэдэвт арга хэмжээг зохион байгуулж байна. Тус үйл ажиллагааг гэрлэлтийн баталгаа аваад арваас дээш жил хамт амьдарсан, хуримаа хийж амжаагүй хосуудад зориулан хийдэг. Энэ удаа Нийслэлийн гэр бүл, хүүхэд залуучуудын газартай хамтран нийслэлийн байгууллагуудад ажилладаг ажилтан, албан хаагчдын дундаас сонгон 16 хосын хуримын ёслолыг хийж байна. Ингэхдээ Гэрлэх ёслолын ордон хосууддаа тодорхой хэмжээний хөнгөлөлт үзүүлсэн. 

Олон жил хамт амьдарсан  хосуудынхаа амьдралд урам зориг өгч, нэгэн дурсамжийг үлдээн, ёслол төгөлдөр хуримаа хийх боломжийг нь олгож байна. Ингэснээр нийгэмдээ үнэ цэнтэй гэр бүлийг бий болгох, бататгах улмаар бусад залуу хосууддаа үлгэрлэн дэмжих үйл ажиллагаа юм. Энэ жилийн хувьд хөнгөлөлт үзүүлэн Мартын 8-ны баярын өдөр одонтой ээжүүдийн хуримын ёслол, Олон улсын гэр бүлийн өдрөөр цагдаагийн байгууллагын ажилтнуудад гээд нийт 50 орчим хосууд гэрлэх ёслолоо албан ёсоор хийсэн” гэв.

 

“Намайг Д.Баяртогтох гэдэг. Эхнэрийг минь Х.Буянтогтох гэдэг. Бид хамт амьдраад 35 жил болжээ. Энэ хугацаанд олон зүйлийг даван туулсан. Хамгийн гол нь эв найрамдалтай байж, үр хүүхдээ сайн хүмүүжүүлэх хэрэгтэй. Гэр бүл болно гэдэг сайн эцэг эх, эхнэр нөхөр байх үүрэг юм. Бид хоёр хоёулаа нийслэлийн хот тохижилтын газрын зам цэвэрлэгч. Энэ ажилдаа 20 гаруй жил ажиллаж байна. Энэ үйл ажиллагаа сайхан боллоо. 60 нас гарч буй бид хоёрыг дэмжсэн хамт олондоо баярлаж байна” хэмээв.

“Намайг О.Долгормаа гэдэг. Өнөөдөр сэтгэгдэл маш өндөр байна. Бид өмнө нь яг ингэж хуримаа хийж байгаагүй. Сайхан байдаг юм байна. Бид Нийслэлийн хот тохижилтын газрын ногоон байгууламжийн газар цэцэрлэгч хийдэг. Бид 13 жил хамт амьдрахдаа бие биеэ дэмжиж ирсэн. Залуу хосууддаа хандаж бие биедээ хүлээцтэй байгаарай гэж хэлмээр байна” гэсэн юм.
Гэрлэх ёслолын ордон үйл ажиллагаагаа тасралтгүй явуулсаар 41 дэх жилтэйгээ золгож байна. 1976 онд байгуулагдаж өнөөдрийг хүртэл нийтдээ 36800 гаруй залуу хосын гал голомтыг бадрааж, хуримын ёслолыг ёслол төгөлдөр зохион байгуулжээ.