Сагсан бөмбөгийн 3×3 төрөлд “Токио-2020” олимпын эрх авсан орнуудыг өнгөрсөн баасан гарагт албан ёсоор зарлалаа. Монголын 3х3 эмэгтэй сагсан бөмбөгчид “Токио-2020” олимпын наадамд өрсөлдөх эрх албан ёсоор авлаа. Ингэснээр Монголын түүхэнд багийн спортын төрлөөр анх удаа олимпын эрх хүртэж байна.

Монголын багаас гадна ОХУ, Румын, БНХАУ-ын эмэгтэй 3х3 сагсан бөмбөгчид олимпын эрх авлаа. Манай бүсгүйчүүд Д.Ганзул, Б.Болор-Эрдэнэ, Э.Чимэддолгор, Б.Солонго нараар багаа бүрдүүлсэн юм. Япон улс зохион байгуулагч орны давуу эрх эдлэн цагаан хуудсаар эрэгтэй багаа оролцуулахаар шийдвэрлэснээр манай эр­чүүд энэ удаа чансаагаараа олимпын эрх авах боломжгүй болов. Эрэгтэй багийнханд олим­пын эрх авах хоёр ч тэмцээн бий. Эрэгтэйчүүдийн ангилалд Серби, ОХУ, БНХАУ, Японы сагсан бөмбөгчид олимпын эрх хүртлээ.

Монголчуудын холын мөрөөдөл болсон багийн спортоор олимпын эрх авахад МҮСБХ-ны ерөнхийлөгч, УИХ-ын гишүүн С.Эрдэнэ маш том үүрэг гүйцэтгэсэн. С.Эрдэнэ сагсан бөмбөгийн хөгжлийг нэг шат ахиулах, аавынхаа хүсэл зорилгыг үргэлжлүүлэхийг хүсээгүй бол өнөөдрийн Монголын амжилт ирэхгүй байсан нь гарцаагүй. Тэрбээр олон нийтийн сүлжээнд “Тэнгэрт байгаа аавынхаа өмнөөс, энэ спортын төлөө үеийн үед хоёргүй сэтгэлээр зүтгэсээр ирсэн гэр бүлийнхээ бүх гишүүдийн нэрийн өмнөөс та бүхэндээ чин сэтгэлийн халуун талархал илэрхийлье. Ахмад, дунд үеийн сагсан бөмбөгчдөө эргэн саная. Үе үеийн сагсан бөмбөгчдийнхөө зүтгэлийн мөрөөр замнасаар өнөөдөр бид олимпод хүрлээ. Эмэгтэй багтаа өндрөөс өндөр амжилт хүсье. Эрэгтэйчүүд маань ч тун удахгүй олимпын эрхээ авна гэдэгт итгэлтэй байна. Тэд маань дэлхийд дөрөвдүгээрт эрэмбэлэгдэж байгаа. Тун удахгүй олимпын эрхийн төлөөх тэмцээн болно. Эрчүүд маань олимпын эрхийг гуйж биш гуядаж авна аа. Үүнд би огтхон ч эргэлзэхгүй байна. Олимпын тэнгэрт төрийнхөө далбааг мандуулахын төлөө хамтдаа зүтгэцгээе” гэжээ.