Гадаад улсаас шуудангийн илгээмжээр их хэмжээний хар тамхи, мансууруулах бодис Монгол Улсын хилээр нэвтрүүлсэн Нигери улсын иргэдэд холбогдох хэргийн шүүх хурал өнгөрөгч баасан гарагт болох байсан ч хойшлогджээ. Учир нь шүүгдэгч У.Ариунзул шинээр өмгөөлөгч авсан бөгөөд уг өмгөөлөгч хэргийн материалтай танилцах хүсэлт гаргасан байна.
Хэргийг эргэн сануулбал, “2019 оны нэгдүгээр сарын 28-ны өдөр Нигерийн дөрвөн иргэн, тэр дундаа сургалтын төвийн багш, 31 настай Адекола Олавасен нь 500 сая төгрөгийн үнэ бүхий хар тамхийг илгээмжээр манай улсын хилээр хууль бусаар нэвтрүүлснийг илрүүлж, баривчилсан. Түүний шуудан илгээмжээс ICE буюу “мөс” гэх төрлийн хар тамхийг хураан авсан байдаг. Энэ хэрэгт Нигери улсын иргэн Анози Парлингтон Дон, Адиоди Елижах Оладапо гэх гурван эрэгтэй, Изичукву Чиома Фавор гэх эмэгтэйг холбогдуулан шалгасан юм.
Тэдэнд нийслэлийн прокуророос Эрүүгийн хуулийн тусгай ангийн 18.5 дугаар зүйлийн 3 дахь хэсэг, мөн хуулийн тусгай ангийн 20.7 дугаар зүйлийн 2 дахь хэсэгт тус тус зааснаар яллах дүгнэлт үйлдэж, шүүхэд шилжүүлжээ. Дээрх хуулийн заалтыг тодруулбал, Эрүүгийн хуулийн 20.7.2 нь “Мансууруулах эм, сэтгэцэд нөлөөт бодис, тэдгээрийн түүхий эдийг худалдаалах зорилгоор хууль бусаар олж авсан, бэлтгэсэн, боловсруулсан, хадгалсан, тээвэрлэсэн, илгээсэн, худалдсан бол хоёр жилээс найман жил хүртэл хугацаагаар хорих ял шийтгэнэ” гэж заажээ. Улмаар шүүх хурал арванхоёрдугаар сарын 2-ны өдөр хүртэл хойшлогдсон байна.