Төрийн албаны зөвлөл, ЦЕГ-ын Тээврийн цагдаагийн албатай хамтран энэ сарын 11-ний өглөөний ажил сургууль эхлэх цагаар буюу 07:00-09:00 цагийн хооронд нийслэлийн таван сургуулийн орчимд гэнэтийн шалгалт хийжээ. Энэхүү шалгалтад төрийн  өндөр албан тушаалтнуудын хүүхдүүд суралцдаг гэгддэг “Орчлон” олон улсын сургууль, Монгол-Оросын хамтарсан “Гуравдугаар сургууль”, “Нэгдүгээр дунд сургууль” болон “British school”, “American school” сургуулийг хамруулжээ. Шалгалтаар төрийн албаны 28 машиныг хувийн зориулалтаар ашиглаж, хүүхдээ зөөж байсан зөрчлийг газар дээр нь илрүүлж баримтжуулсан байна. Тухайлбал Монгол-Оросын хамтарсан гуравдугаар сургууль дээр 16, “Орчлон” сургууль тав, Нэгдүгээр дунд сургууль дээр тав, “British school”-д нэг, “American school”-д нэг гэх зэргээр  хоёрхон цагийн дотор олон зөрчлүүд илэрчээ. Эдгээр сургуулиудад хүүхэд зөөж авчирсан автомашинууд нь төрийн албаных  болох нь машины гэрчилгээгээр тогтоогдсон байна.

 

Мөн энэхүү хамтарсан шалгалтад ЦЕГ-ын дарга С.Баатаржав өөрөө бүдэрчээ. Монгол Оросын хамтарсан гуравдугаар сургууль дээр хүүхэд буулгасан албаны автомашинуудын нэг болох 01-00 УБЗ дугаартай Тоёотой ланд 200 маркийн автомашин нь ЦЕГ-ын даргын албан хэрэгцээндээ ашигладаг машин болохыг Зариг.мн мэдээлсэн байна.
Манай улсын төрийн албан тушаалтнууд төрийн үйлчилгээнд ашиглах ёстой автомашиныг хувьдаа хэрэглэдэг нь нууц биш. Тэгвэл энэхүү зөрчлийг арилгах, бусад нь шаардлага тавих биш харин ч дарга нар эрх ямбаныхаа нэг хэсэг хэмээн хүлээн авч төрийн албанаас цалинждаг жолоочоо хувийнхаа ажилд зарах нь элбэг. Шалгалтын эцэст албаны машиныг хувийн хэрэгцээнд ашиглахгүй байхыг Төрийн албаны ёс зүйн протоколд тусгах асуудлыг Засгийн газрын хуралдаанаар ярилцахаар болжээ. Мөн төрийн байгууллагын машиныг хувийн зорилгоор ашиглаж буй мэдээллийг иргэдээс 24 цагаар Төрийн албаны зөвлөлийн пэйжээр болон info@csc.gov.mn имэйл хаягаар хүлээн авах юм.