Баруун бүсийн төв Ховд аймгийн Онцгой байдлын газрын гал түймэр унтраах, аврах 48 дугаар ангийн гадна талбайд албандаа 40 жил “зүтгэсэн” машиныг хөшөө болгон мөнхөллөө. Уг “Зил-130 АЦ 40” маркийн гал унтраах автомашиныг 1976 оноос хойш ард иргэдийн аюулгүй байдлыг хангах, гал усны голомтод үүрэг гүйцэтгэн ажиллахад ашигласан байна.
Гал түймэр унтраах, аврах 48 дугаар анги 50 жилийн ойтойгоо золгож буй ба алба хаагчид ангийнхаа 50 жилийн ойд зориулан албандаа өнөөг хүртэл хамтдаа зүтгэсэн улаан машиндаа техникийн бүрэн үйлчилгээг хийж, өнгө үзэмжийг сэргээн засварлан хөшөө босгосон нь энэ юм.
Хөшөөний нээлтийн ажиллагаанд  ОБЕГ-ын дарга, хошууч генерал Т.Бадрал болон Баруун бүсийн Ховд, Увс, Говь-Алтай, Завхан аймгийн Онцгой байдлын газрын удирдлагууд оролцлоо.