УИХ-ын Байгаль орчин, хүнс, хөдөө аж ахуйн байнгын хорооны өчигдрийн хуралдаанаар (2019.11.19) “Байгаль орчны төлөв байдлын 2017-2018 оны тайлан”-г хэлэлцэв. Тайланг БОАЖ-ын сайд Н.Цэрэнбат танилцууллаа. Тайланд цаг агаар, уур амьсгалын төлөв байдал, түүний өөрчлөлтийн талаар дурджээ. Монгол орны жилийн дундаж агаарын температур сүүлийн 79 жилд 2.25 хэмээр дулаарсан байна. 2017 оны жилийн дундаж агаарын температур 1.6 хэм буюу 1940 оноос хойш ажиглагдсан хоёр дахь дулаан жил байжээ. Сүүлийн жилүүдэд агаар мандлын гаралтай аюулт болон гамшигт үзэгдлийн тоо ихэсч, 1989-2000 онд жилд дунджаар 30 орчим аюултай үзэгдэл ажиглагддаг байсан бол 2001- 2018 онд хоёр дахин нэмэгджээ. Ингээд өнгөрсөн онд цаг агаарын гаралтай аюулт үзэгдэл 70, гамшигт үзэгдэл 18 болж нийгэм, эдийн засагт нийт 24.1 тэрбум төгрөгийн шууд хохирол учруулсан байна. Уур амьсгалын өөрчлөлтийн үндсэн шалтгаан болох хүлэмжийн хийн ялгарал нь сүүлийн жилүүдэд өсөх хандлагатай байгаа аж. Монгол Улсын хүлэмжийн хийн ялгарал 2014 оны байдлаар 34.4 сая тонн буюу дэлхийн нийт хүлэмжийн хийн ялгарлын 0.1 хувийг эзэлж байгаа гэв. Сүүлийн жилүүдэд уур амьсгалын өөрчлөлт, бэлчээрийн талхлагдал, тариалангийн талбайн хөрсний үржил шимийн бууралт, уул уурхайн зохисгүй үйл ажиллагаанаас үүдэлтэй газрын доройтол, цөлжилт эрчимжиж, нийт нутаг дэвсгэрийн 76.8 хувь нь цөлжилтөд өртсөн байна. Цөлжилтийн 51 хувь нь байгалийн хүчин зүйлээс, 49 хувь нь хүний хүчин зүйлийн нөлөөлөлтэй үүссэн гэж дүгнэсэн байна. Уур амьсгалын өөрчлөлт, бэлчээрийн талхлагдал, уул уурхайн зохисгүй үйл ажиллагаанаас үүдэн булаг шанд, гол горхи, нуур, тойром хатаж ширгэх үйл явц нэмэгдэн 2018 оны усны тоо бүртгэлийн мэдээгээр 527 гадаргын усны эх үүсвэр хатаж, ширгэж, 519 нь сэргэсэн байна.