Өнгөрсөн долоо хоногт Өвөр Монголд хоёр хүн тарваган тахлаар өвчилж, Бээжинд эмчлүүлж байгаа тухай Шиньхуа агентлаг мэдээлсэн. Тэгвэл тарваган тахлын гурав дахь тохиолдол илэрчээ. Өвөр Монголын Улаан Цав аймгийн Хуадэ хошууны анчин зэрлэг туулай агнаж, махыг нь идсэнээс өвчилсөн байна. Үүнтэй холбоотойгоор өвчтөнтэй ойр байсан 28 хүнийг тусгаарлажээ. Тарваган тахал бол хил хязгаараас хамаарахгүй тархдаг аюултай бөгөөд 1400-аад онд Европ тивийн 50 сая хүнийг үхүүлж, “хар үхэл” хэмээн нэрлэгдсэн өвчин.  Тарваган тахал нь мэрэгч амьтнаас хүнд дамждаг маш аюултай халдвартай тахал. Өнөөдөр дэлхий даяар жил бүр тарваган тахлын 1000 орчим тохиолдол бүртгэгдэж байгааг Дэлхийн Эрүүл Мэндийн Байгууллагын тайланд дурджээ. Тарваган тахлын халдвар хамгийн их илэрдэг орнуудыг Конго, Мадагаскар, Перу улсууд тэргүүлж байна. Энэ оны тавдугаар сард Монгол Улсын Баян-Өлгий аймагт нэг гэр бүлийн хосууд тарваганы түүхий эд эрхтнийг идсэний улмаас өвчилж, амиа алдсан юм.