Өнгөрсөн наймдугаар сард албаны машиныг хүүдээ унуулж зугаацуулсан МАА-н Эрдэм шинжилгээний хүрээлэнгийн захирал Т.Батсүх ажилдаа эргэн томилогджээ. Тодруулбал,  түүний хүү Б.Батсайхан нь найзуудынхаа хамтаар албаны машинаар Өвөрхангай аймагт зугаалж буй бичлэгийг Zarig.mn сайтын сурвалжлах баг баримттайгаар олон нийтэд цацаж байсан юм.
Улмаар салбар яамны сайд нь хүрээлэнгийн нэр дээр бүртгэлтэй “3303 УБВ” дугаартай автомашиныг амин хувьдаа ашигласан хэмээн албан тушаалаас нь чөлөөлөх шийдвэрийг гаргаж байв.
Тэгвэл тэрбээр ажлаасаа халагдсан даруйдаа шүүхэд гомдол гаргаж байсан бөгөөд түүний гомдлыг шүүх өнгөрсөн сарын 29-ны өдөр хэлэлцээд түүнийг хууль бусаар ажлаасаа чөлөөлөгдсөн хэмээн үзэж ажилд нь буцаан томилсон байна.
Үүгээр ч зогсохгүй ажилгүй байсан хугацааны нөхөн олговор буюу 51 хоногийн ажлын хөлс 7 сая 342 мянга 590 төгрөг олгох шийдвэрийг тус тус гаргаснаар тэрбээр ийнхүү эргэж захирлынхаа суудалд заларчээ.
Тэрбээр хэвлэл мэдээллийн хэрэгслээр өөрийнх нь оронд томилогдсон доктор М.Найданхүүгийн аав Минжигдорж болон үе үеийн захирлуудыг Эрдэм шинжилгээний хүрээлэнгийн газрыг хувьдаа авсан хэмээн зарлаж багагүй тэмцэл өрнүүлсэн тухай хэвлэлүүд онцолж байна.