Их эзэн Чингис хааны мэндэлсний 857 жилийн ой өнөөдөр /2019.11.27/ тохиож байна. Ойн хүрээнд Монгол Улсын Ерөнхийлөгч Х.Баттулга “The Hu” хамтлагт “Чингис хаан” одон гардуулна.

Чингис хаан одонг  улс орныхоо тусгаар тогтнол, бүрэн эрхт байдал, үндэсний эв нэгдлийг бататган бэхжүүлэх, төрт ёс, түүх соёлынхоо уламжлалыг гүнзгий судалж, хойч үедээ өвлүүлэх, тэдгээрийг дэлхий дахинд сурталчлан таниулах үйлсэд үнэтэй хувь нэмэр оруулж, төр, нийгэм, үндэстний өмнө онцгой гавьяа байгуулсан иргэнд их эзэн Чингис хааны мэндэлсний ой, “Монгол бахархлын өдөр” жил бүрийн өвлийн тэргүүн сарын шинийн 1-нд гардуулдаг уламжлал тогтсон билээ.

 Тиймээс энэхүү тэргүүн зэргийн одонг Монголын уламжлалт хөгжмийн зэмсгийг хөөмийтэй хослуулан, өвөрмөц хэв маягаар гарч ирсэн металл рок “The Hu” хамтлагт олгохоор шийдвэрлэсэн юм. Дэлхийн хөгжмийн ертөнцийг байлдан дагуулж байгаа хамтлагийн анхны цомог болох “Гэрэг” борлуулалтаараа Биллбоардын жасаалтыг тэргүүлж, Дэлхийн нэр хүндтэй уран бүтээлчдийг ардаа орхисон нь Монголын соёл урлагийг дэлхийд таниулсан томоохон амжилт билээ.