Тээврийн цагдаагийн албаныхан маргааш буюу 11 дүгээр сарын 29-нд замын хөдөлгөөнд оролцогч хүн бүхнийг замын хөдөлгөөнд соёлтой, дүрмийн дагуу оролцохыг уриалж “Хичээх өдөр” арга хэмжээг зохион байгуулахаар болжээ. Энэ өдөр дэлхий нийт зам тээврийн ослоор нас барсан иргэдэд хүндэтгэл үзүүлдэг уламжлалтай.

Зургаа дахь жилдээ болох “Хичээх өдөр”  арга хэмжээг тохиолдуулан 11.00 - 11.10 минутын хугацаанд нийслэлийн гол уулзваруудын замын хөдөлгөөнийг түр хугацаагаар хаана. Энэ хугацаанд түргэн тусламж, цагдаа, онцгой байдлын аврагчид уулзваруудад төлөвлөсөн арга хэмжээгээ хийхээр төлөвлөжээ.

Сонирхуулахад, манай улсад нэг хоногт зам тээврийн ослоор 15-20 хүн гэмтэн, 1-2 иргэн зам тээврийн ослоор амь насаа алддаг гэсэн судалгаа бий. Тэдний дунд бага насны хүүхдүүд цөөнгүй байдаг. Тодруулбал, өнгөрсөн онд зам тээврийн ослоор 46 хүүхэд амиа алдсан бол энэ оны эхний арван сарын байдлаар 49 хүүхэд эндсэн байна.