Б.Мөнхбайгаль

  Хөгжлийн бэрхшээлтэй иргэд бусдын адил улс төр, эдийн засаг, нийгэм соёлын харилцаанд оролцох эрхтэй. Ингэхдээ нийгмийн баялгаас тэгш хүртэх, улс орныхоо хөгжилд хувь нэмрээ оруулах, сурч боловсрох, хөдөлмөрлөх, үгээ хэлэх, хамгаалуулах эрх бий.
  НҮБ-ын Ерөнхий Ассамблейгаас жил бүрийн арванхоёрдугаар сарын 3-ны өдрийг хөгжлийн бэрхшээлтэй хүмүүсийн эрхийг хамгаалах өдөр болгон зарлаж дэлхий нийтээрээ 20 гаруй жил тэмдэглэж байгаа юм.
  Энэ жил хөгжлийн бэрхшээлтэй хүмүүсийн эрхийг хамгаалах өдрийг “Хүртээмжтэй ирээдүй” уриан дор тэмдэглэн өнгөрүүлэхийг уриалсан. Тус уриалгад Баянгол дүүрэг нэгдэж, гэрээсээ тэр бүр гарч олон нийтийн үйл ажиллагаанд оролцож чадахгүй байгаа иргэддээ нийгмийн хөгжлийн үйлчилгээ үзүүлэх, тэдэнд хүндэтгэл үзүүлэх арга хэмжээг зохион байгууллаа.
  Мөн улс орондоо хувь нэмрээ оруулж сурч хөдөлмөрлөж яваа хөгжлийн бэрхшээлтэй иргэдээ дэмжих, тэдэнд урам зориг өгөх зорилгоор 46 иргэнд тус дүүргийн ИТХ-ын Хүндэт жуух, Засаг даргын Хүндэт жуух батламжийн хамт гардууллаа. Түүнчлэн энд хөгжлийн бэрхшээлтэй 1000 иргэн цуглажээ.
  Хөдөлмөрийн чадвараа алдсан ч улсдаа 33 жил хөдөлмөрлөж ажилласан Баянгол дүүргийн долдугаар хорооны иргэн А.Оюунцэцэг, хөгжлийн бэрхшээлтэй хүмүүсийн эрхийг хангах, хамгаалах чиглэлээр тууштай ажиллаж байгаа хоёрдугаар хорооны иргэн Ч.Ундрахбаяр нарыг дүүргийн “Хүндэт иргэн”-ээр тодрууллаа.
  УИХ-ын гишүүн асан, Баянгол дүүргийн Засаг дарга С.Одонтуяа:
  “Энэхүү үйл ажиллагаа нь хөгжлийн бэрхшээлтэй иргэдийн нийгмээс тусгаарлагдсан мэдрэмжийг арилгах, нийгмийн арга хэмжээнүүдэд идэвхтэй хамруулах зорилготой. Хоёр жилийн өмнө бид харааны бэрхшээлтэй иргэдэд анх удаа 90 айлын орон сууцыг ашиглалтад оруулсан. Мөн өнгөрсөн жил хөгжлийн бэрхшээлтэй хүүхдийн нөхөн сэргээх төвийг ашиглалтад оруулсан. Бусад эмнэлгүүд ч бас энэ чиглэлээр тэдэнд таатай нөхцөлийг бүрдүүлж ажиллахыг зорьж байна. Бид аль болох ээлтэй орчныг бүрдүүлэх болно.
  Хамгийн гол нь эдгээр хүмүүст байнга тогтмол уулзалдах клуб болон төвүүдийг дэмжих шаардлагатай байна. Түүнчлэн үзлэг оношилгоог гэрээр хийх, өвдөлтийг багасгах зэрэг эрүүл мэндийн асуудлуудыг шийдэх нь чухал. Мөн хөгжлийн бэрхшээлтэй иргэдэд ажлын байрыг бий болгож, өөрсдийн хийсэн гар урлалын бүтээгдэхүүнийг нь борлуулахад туслалцаа үзүүүлэх хэрэгтэй. Тиймээс бид цаашдаа үйл ажиллагаагаа улам өргөтгөж, хөгжлийн бэрхшээлтэй иргэдээ дэмжих, тэдэнд хэрэгтэй, хүссэн үйлчилгээг үзүүлэхэд анхаарах болно” гэв.
  Тус дүүрэг нь 2016-2020 оны үйл ажиллагааны хөтөлбөртөө хөгжлийн бэрхшээлтэй иргэдэд ээлтэй дүүрэг болох зорилт тавиад буй юм. Зорилтын хүрээнд хөгжлийн бэрхшээлтэй хүүхдийн эрт үеийн илрүүлэг, хөгжлийн дэмжлэгийн эрт үед нь үзүүлэх, төрийн албан хаагчид, үйлчилгээний ажилчдын хандлагыг өөрчлөх нөлөөллийн ажлуудыг хийж байна. Мөн Сонсголын бэрхшээлтэй иргэдийн сагсан бөмбөгийн тэмцээн, Евро Азийн сонсголын бэрхшээлтэй иргэдийн спортын анхдугаар наадам, “Монголын үндэсний пара хөнгөн атлетикийн тэмцээн” зэрэг үйл ажиллагаанд оролцох тамирчдаа дэмжин ажиллаж байгаа аж.