Тус газрын дэд дарга С.Даваасүрэн “Өнгөрсөн шөнийн байдлаар Улаанбаатар хотод угаарын хийнд хордсон зургаан өрхийн  18 иргэн байна. Тэдгээрээс хүүхэд зургаа, насанд хүрсэн хүн 12 байсан юм. Уг зургаан өрхийн хоёр нь гэрт, дөрөв нь байшинд амьдардаг. Дуудлагаар очиход гурван айлын зуух яндангийн холбоос буруу, хоёр айл нь үнсээ аваагүй, нэг нь түлшээ буруу түлсэн байсан. Одоогоор эдгээр иргэдийн бие хэвийн байгаа. Бид мэдээлэл, зөвлөгөө өгч ажилласан.

Үүнээс гадна иргэдийн зүгээс түүхий нүүрс түлж буй талаар мэдээлэл ирж байна. Баянгол дүүргийн 3, 7 дугаар хороо буюу утаагүй бүсэд шахмал түлш хэрэглэж байсан аж ахуйн нэгжид торгуулийн арга хэмжээ авсан. Хан-уул дүүргийн 17 дугаар хороонд “Эко констракшн” компани панер түлж хэрэглэж байсныг илрүүлж 3 хүртэлх сая төгрөгөөр торгосон” гэж хэллээ.
Мөн Баянгол дүүргийн 7 хороо, "Говь" сауны баруун талд айл өрх болон дугуй засварууд утаа гаргасан асуудал үүссэн. Үүнд шалгалтын ажиллагаа явуулж Зөрчлийн хэрэг нээсэн. 2017 оноос Улаанбаатар хотыг бүсчилж тодорхой хороодод утаа гаргахгүй, зөвхөн цахилгаанаар дулаанаа хангах захирамж гарсан. Тухайн утаа гаргахыг хориглосон бүсд сайжруулсан шахмал түлш хэрэглэсэн зөрчил илэрч байна. Иргэд сайжруулсан түлш л бол аль ч хороо, бүсд түлж болно гэж буруу ойлгоод байна. Тодорхой хязгаар бий. Тиймээс аж ахуй нэгж, иргэд нийслэлийн бүсчлэлийг сайтар анхаарах хэрэгтэй гэдгийг албаныхан мэдээлсэн юм.

Агаарын чанартай мэдээллийн хувьд өнгөрсөн долоо хоногийн хувьд хүхэрлэг хий 2.4 дахин их, азотын давхар исэл өнгөрсөн оны мөн үетэй харьцуулахад ижил түвшинд, PM10 буюу том ширхэгт тоосонцрын хэмжээ өнгөрсөн оны энэ үетэй харьцуулахад 2.4 дахин бага, PM2.5 буюу нарийн ширхэгт тоосонцор 2.1 дахин бага хэмжигдсэн талаар нийслэлийн Агаарын бохирдолтой тэмцэх газрын мэргэжилтэн танилцууллаа.