Үндсэн хуулийн цэцийн нийт гишүүдийн хуралдаан өнөөдөр болж,  Үндсэн хуулийн цэцийн даргад нэр дэвших, дэвшүүлэх, сонгох асуудлыг хэлэлцлээ.

  Үндсэн хуулийн цэцийн тухай хуулийн зургадугаар зүйлийн 1 дэх хэсэгт “Цэцийн даргаар сонгох хүний нэрийг Цэцийн гишүүд дотроосоо дэвшүүлэн хуралдаанаараа хэлэлцэж, саналыг нууцаар хурааж нийт гишүүний олонхийн санал авсан хүнийг сонгоно” гэж заасан байдаг.

  Үндсэн хуулийн цэцийн нийт гишүүдийн 93,9 хувийн саналаар  Н.Чинбатыг Монгол Улсын Үндсэн хуулийн цэцийн даргаар сонголоо.

  Тэрээр 1998-2004 онд Монгол Улсын Үндсэн хуулийн цэцийн гишүүнээр томилогдон ажиллаж байсан бөгөөд Монгол Улсын гавьяат хуульч цолтой юм. 

  Н.Чинбатын товч намтар:

• 1956 онд Улаанбаатар хотод төрсөн, эхнэр хоёр хүүхдийн хамт амьдардаг.
•  1979 онд Монгол Улсын Их Сургууль төгссөн хуульч, эрх зүйч мэргэжилтэй.
• 1979-1990 онд Монгол Улсын Их Сургуулийн хууль зүйн багш, Хууль зүйн тэнхимийн орлогч эрхлэгч,
• 1990-1993 онд Улсын Дээд шүүхийн орлогч, дарга, Иргэний хэрэг эрхэлсэн шүүх коллегийн дарга,
• 1993-1996 онд Улсын Их Хурлын даргын Хуулийн бодлогын зөвлөх,
• 1998-2004 онд Үндсэн хуулийн цэцийн орон тооны бус гишүүн,
• 2016 онд Оюуны өмчийн газрын дарга, 2016 оноос Хууль зүй, дотоод хэргийн сайдын зөвлөхөөр ажиллаж байсан.