Л.ЭНХЦЭЦЭГ

 Ардчилсан хувьсгалын 30 жилийн ойг тэмдэглэн өнгөрүүлэх хүрээнд "Ардчиллын замнал-алдаа, оноо-сургамж-сорилт" нэртэй таван ботиос бүрдэх номын нээлт өчигдөр боллоо.

Нээлтэд Эрүүл мэндийн сайд асан С.Ламбаа болон Ардчилсан намын зарим гишүүд төлөөлөгчид, тус номын зохиолч, судлаачид оролцсон юм.

Ардчилсан намын ерөнхий нарийн бичгийн дарга Ц.Туваан “2019 он манай намын хувьд 30 жилийн ой тохиосон чухал жил болж байна. Энэ хүрээнд олон ажил төлөвлөж хийж буй нь нэг нь ном бүтээх байсан. Ном оо ч амжилттай дуусгалаа. Энэхүү таван боть номонд маань Ардчилсан намын өнөөг хүртэлх түүхэн замналаас эхлээд Монгол улсын түүх ч мөн орсон. Монгол орныг цогцлоох, төвхнүүлэхийн төлөөх тэмцлийн эхлэл өрнөл, тухайн цаг үеийн онцлог, болж өнгөрсөн үйл явдлууд хэн, хэрхэн оролцов, оройлон манлайлагчид хэн байв, бэрхшээл саадыг хэрхэн туулав, ямар үр дүнд хүрэв зэрэг олон түүхэн үйл хэрэг багтсан маш чухал бүтээл болсон. Ардчилал 30 жилээр дуусахгүй. Цаашдаа мянган жил үргэлжлэх учраас энэ ажлыг үүр ч явах залуучуудад өмнөх үеийн түүхээ судалж мэдэхэд туслах гүүр болно гэж найдаж байна” гэв.

Таван ботиос бүрдэх энэхүү номын зохиолчоор Монгол улсын гавьяат багш Т.Лхагваа ажилласан бол судлаачаар Төрийн удирдлагын магистр, судлаач Н.Анхтуяа, Ардчилсан хувьсгалын ахмад зүтгэлтэн Б.Болд, Номын ерөнхий редактороор Түүхийн ухааны доктор  Б.Дэлгэрмаа нар ажиллажээ.