Нийслэлийн Хангарди ордны гадна авто зам ашигласны төлбөрийн хувь хэмжээг шинэчлэн баталсантай холбогдуулан өнөөдөр иргэд эрсэргүйцлээ илэрхийлж машинтай жагсаал хийж байна.

НИТХ-ын хуралдаанаар авто зам ашигласны төлбөрийн хувь хэмжээг шинэчлэн баталсан бөгөөд машин эзэмшигчидийн төлбөр хамгийн багадаа тав дахин нэмэгдсэн билээ. тухайлбал, 2000 см3 хүртэл багтаамжтай тээврийн хэрэгсэл, үүний хамгийн гол төлөөлөл болох приүс автомашин эзэмшигч 2019 онд авто зам ашигласан хэмээн 20 мянган төгрөг төлдөг байсан бол ирэх онд 100 мянган төгрөг төлнө.

Ийнхүү төлбөрийг тав дахин нэмснээр 2020 онд авто зам ашигласны төлбөрөөс төсөвт 73 тэрбум 579 сая 715 мянган төгрөг төвлөрүүлэхээр тооцоод байгаа аж. 

Жагсагчдын нэгэн төлөөлөл “Өнөөдөр энд мянган машинтай иргэд ирсэн байна. Хэрэв бидний шаардлагыг хүлээж авахгүй бол 10 мянган машин ирэх болно. Аз жаргалтай хот болгоно гэчихээд ард түмнийхээ идэх хоолноос нь хумслан өөрсдөө аз жаргалтай амьдарч, иргэдээ аз жаргалгүй болгож байна. НИТХ-ын 22 гишүүн өнөөдрийн цуглааныг Хангарди ордноосоо харж байгаа байх. Хэн нэгэн төлөөлөгчөө биш Нийслэлийн Засаг дарга С.Амарсайхан өөрөө гарч ирээд бидэнтэй уулзаач гэж шаардаж байна” гэсэн юм.

Тэд уг жагсаалаа энэ долоо хоногийг дуустал буюу арванхоёрдугаар сарын 15-ний ням гараг хүртэл хийнэ гэлээ. Гэсэн ч машинтай жагсагчдын автомашиныг ачихаар ачилтын машинууд ирээд байгаа аж.