Нийслэлийн автозам ашигласны төлбөрийг тав дахин нэмэгдүүлснийг эсэргүүцэж буй иргэд "Автомашинтай жагсаал"-ыг өнөөдөр  Төрийн ордныг тойрон зохион байгуулж байгаа билээ. Хэдийгээр төлбөрийг дээрх хэмжээгээр нэмэгдүүлсэн шийдвэрээ эргэн харж, холбогдох тооцоо судалгааг хийн дахин НИТХ-аар хэлэлцүүлэхээр болсон ч жагсаал үргэлжилсээр байна. Жагсагчид төлбөр нэмсэн шийдвэрээ цуцлах, нийтийн тээвэрт ашиглах 1,200 автобусыг дотоодын үйлдвэрлэгчээс авах, НӨАТ-ын буцаан олгох хэмжээг 100 хувь байлгах зэрэг шаардлагуудыг тавьж, эсэргүүцлээ илэрхийлж байгаа юм. Энэ үеэр жагсаалд оролцогч нэг иргэн эсэргүүцлээ илэрхийлж, хувцсаа тайлжээ.

Жагсагчид Засгийн газрын ордны баруун талын замын нэг эгнээг хааснаар иргэд замын нэг эгнээгээр зорчиж, улмаар замын ачаалал ихэссэн байна. Ингэснээр Төв шуудан, Залуучуудын өргөө чөлөө, ШУТИС-ийн уулзварт ачаалал үүсэж, хөдөлгөөний хурд саарсан хэмээн Замын хөдөлгөөний удирдлагын төвөөс мэдээллээ.