Авто зам ашигласны төлбөрийг тав дахин нэмэгдүүлснийг эсэргүүцэн жагсаал зохион байгуулсан Авто машинтай жагсагчид өчигдөр Төрийн ордныг гороолж, авто зам хаав. Тэд мөн нийгмийн даатгалын сангаас дутсан хөрөнгийг ард иргэдээс татвар нэмэх байдлаар биш шударга бусаар хөрөнгөжсөн зарим албан тушаалтнуудад хариуцлага тооцох замаар нөхөхийг шаардаж байгаа аж. Мөн үүнээс гадна, НӨАТ-ыг иргэдэд 100 хувь буцаан олгох, нийгмийн даатгалын шимтгэлийг 26 хувь болгох хуулийг яаралтай засах, бүх төрлийн зээлийн хүүг бууруулах, шатахууны үнийг дэлхийн жишигт хүргэж бууруулах, авто зам ашигласны төлбөрийг тав дахин нэмэх шийдвэрээ цуцлахыг шаардаж буй юм.
Жагсаал өглөөний 07:00 цагт эхэлсэн бөгөөд ирэх баасан гараг хүртэл үргэлжлэх төлөвтэй байгаа аж. Мөн үдийн хойно 40 гаруй насны эр гэнэт хувцсаа тайлж нүцгэлсэн юм. Энэ мэт нөхцөл байдлаас үүдээд Ерөнхий сайд У.Хүрэлсүх өчигдөр (2019.12.09) нийслэлийн Засаг дарга С.Амарсайханыг Төрийн ордонд дуудаж уулзан, асуудлыг НИТХ-аар дахин хэлэлцэхийг чиглэл болгожээ.
Эргэн сануулахад, НИТХ-аас өнгөрөгч долоо хоногт авто зам ашигласны төлбөрийг тав дахин нэмэгдүүлэх шийдвэр гаргасан юм. Ингэснээр 1,000-2,000 см3 хүртэл хөдөлгүүрийн багтаамжтай машины авто зам ашигласны төлбөр 100,000 төгрөг, 4,500-аас дээш хөдөлгүүрийн багтаамжтай машины авто зам ашигласны төлбөр 350,000 төгрөг болж нэмэгдсэн. Төлбөрийг нэмснээр нийслэлийн төсөвт 70 орчим тэрбум төгрөг орж ирнэ, түүгээр авто замаа сайжруулж шинэчлэн барихаар төлөвлөж байсан юм.
Харин дээрх жагсаалын улмаар өнөөдөр НИТХ-ыг ээлжит бусаар хуралдуулж, уг нэмэгдлийг ахин хэлэлцэхээр болоод байна. Энэхүү шийдвэрийн талаар зарим эх сурвалж, “Ерөнхий сайд У.Хүрэлсүх ард түмний дунд өөрийн рейтингийг өсгөхийн тулд зохион байгуулалттай жүжиг тавьж байна. Авто зам ашигласны төлбөрийг жинхэнээсээ нэмэх бодолгүй байсан. Харин санаатайгаар НИТХ-аар ийм шийдвэр гаргуулж, дараа нь өөрөө буцаалгаж буй жүжгийн гол дүрд У.Хүрэлсүх тоглож байна” гэж байлаа.