Эдийн засагчид, улстөрчид, иргэд Оюу толгой төслийн гэрээний талаар өөр өөрсдийн байр сууриа илэрхийлж сайн муугаар хэлдэг. Гэвч энэ төсөл яах аргагүй Монгол Улсын нийгэм, эдийн засагт эерэг нөлөөлдөг гэдэгт санал нэгддэг билээ. Тэгвэл Оюу толгой төсөл гүний уурхайн үйлдвэрийн амаа барьж дуусгалаа. 

 “Оюу толгой” компанийн ТУЗ-ийн дарга Г.Батсүх “Гүний уурхайн энэхүү Үйлдвэрийн амыг амжилттай барьж дуусгахад манай улсын төр, засгийн газрын байгууллагуудын дэмжлэг чухал ач холбогдолтой байсан. Энэхүү томоохон бүтээн байгуулалт нь манай орны уул уурхайн салбар, технологийн хөгжил, дэвшилд ихээхэн хувь нэмэр оруулж байна” хэмээн хэллээ.
“Оюу толгой” компанийн Гүйцэтгэх захирал Армандо Торрес “Үйлдвэрлэлийн амны уулын нэвтрэлтээс эхлээд газрын гүнд шаардлагатай тоног төхөөрөмжүүдийг байрлуулах, барилгын нүсэр бүтээн байгуулалтын ажлыг дуусгахад нийт гурван жил дөрвөн сарын хугацаа орлоо. Оюу толгойн гүний уурхайг бүрэн цогцлоох гол алхам болох нарийн дэд бүтцийг барьж дуусгахад Монгол Улсын үндэсний 50 орчим компанийн 2500 хүн 2.6 сая цаг аюул ослоос ангид ажиллалаа” гэв.
 Сонирхуулахад үйлдвэрлэлийн энэ ам нь нийт 1300 метрийн гүнтэй бөгөөд газрын гадарга дээр 96 метр өндөр. Өөрөөр хэлбэл, зөвхөн газрын гадарга дээрх цамхагийн барилга нь гэхэд АНУ-ын Эрх чөлөөний барилгаас дөрвөн метрээр өндөр аж. Уг хөшөө суурийн тавцангаас галт бамбарын үзүүр хүртэл 92 метр гэдэг.
 Үйлдвэрлэлийн энэ үндсэн амаар хүн болон ачаа тээвэрлэж, мөн хүдрийн чулуулгийг газрын гадарга руу гаргана. Үйлдвэрлэлийн амны бүтээгдэхүүн тээвэрлэх өргүүр нь дэлхийд томдоо орох “Коепе” (үрэлтийн хүчний өргүүр) ган татлагат өргүүрийн системтэй. Уг өргүүрийн 60 тонны даацтай ачаа тээвэрлэх хоёр хөнөг 59 км/цаг буюу хамгийн дээд хурдаараа өдөрт 28 мянган тонн хүдэр тээвэрлэх хүчин чадалтай. Үйлчилгээний амны хөнөг нэг удаадаа 60 хүн тээвэрлэх хүчин чадалтай бол Үйлдвэрлэлийн амаар нэг дор 300 хүн тээвэрлэх боломжтой юм. Үйлдвэрлэлийн амны өргүүрийн ган татлага суурилуулах ажилд 500 орчим хүн оролцож, 23 хоног зарцуулсан нь энэ төрлийн ажлуудаас дэлхийд хамгийн өндөр бүтээмжтэй, аюулгүй хийсэн угсралтын ажил болсон байна. Эцэст нь хэлхэд энэ ам ашиглалтад орсноор Оюу толгой төсөл гүний уурхайн хүдрийн биетдээ хүрэх цаг хугацаа ойртож буй ажээ.