Өсвөр насны хүүхдүүд бага ангийн сурагч охинд ёс бус үйлдэл үзүүлж, онгон хальсыг нь хөндсөн гэх жигшүүрт хэрэг Өмнөговь аймгийн цагдаагийн газарт бүртгэгджээ. Хэргийн тухай тодруулбал, тус аймгийн ерөнхий боловсролын ... сургуулийн 12-13 насны хөвгүүд сургуулийнхаа охидын ариун цэврийн өрөөнд нэгдүгээр ангийн сурагч охиныг бэлгийн дарамтад оруулсан ёс бус үйлдэл гаргажээ.

Хэргийн тухай хохирогч охин ээждээ мэдэгдсэнээр аймгийн эмнэлэгт үзүүлэхэд охины онгон хальс хөндөгдсөн байжээ. Улмаар хохирогч охины ээж Өмнөговь аймгийн цагдаагийн газарт өргөдөл гаргаснаар хэргийг шалгаж эхэлсэн байна. Хэргийг сургуулийн орчинд үйлдсэн учраас тус сургуулийн захиргааныханд хариуцлага тооцох тухай асуудал яригдаж эхэлжээ.

Сургуулийн орчин дахь хүчирхийллийг таслан зогсоож, хүүхэд бүрийн сурч боловсрох, хүсэл мөрөөдлөө биелүүлэх эрхийг хангаж, тэдэнд аюулгүй орчин бүрдүүлж өгөх зорилго бүхий "Аюулгүй суралцах" санаачилгын хүрээнд ЮНЕСКО-оос "Сургуулийн орчин дахь дээрэнгүйлэл, хүчирхийллийг зогсоох нь" тайлан гаргасан байдаг. Энэ тайланд дурьдсанаар, сүүлийн 12 сарын хугацаанд сургуулийн орчин дахь дээрэнгүйлэл, хүчирхийлэлд өртсөн нийт хүүхдүүдийн 43.8 хувь нь зодоон хийсэн бол 30 хувь нь бие махбодын халдлагад өртсөн байна. Сургуулийн орчинд дээрэлхүүлсэн, хүчирхийлэлд өртсөн сурагчдын ихэнх нь 10-14 настай хүүхдүүд байжээ. 2002-2017 оны хооронд хийгдсэн судалгаанаас харахад Монгол Улсад 13-15 настай эмэгтэй хүүхдүүдийн дунд бие махбодын халдлага, дээрэнгүйлэл нэмэгдсэн үзүүлэлт гарсан талаар албаны тоо баримт бий.

Манай улсад гарч буй сургуулийн орчин дахь дээрэнгүйлэл, хүчирхийллийн 22 хувь нь сэтгэл зүйн, 20.9 хувь нь бие махбодын, 3.3 хувь нь бэлгийн хүчирхийлэл байгаа бөгөөд эдгээр хүчирхийллийн 15.4 хувь нь сурагчдын гаднах төрх, үзэмжээс, 3.4 хувь нь арьсны өнгө, үндэс угсаа, гарал үүслээс, 1.6 хувь нь шашин шүтлэгээс шалтгаалсан байдаг аж. Түүнчлэн бие махбодын хүчирхийлэл хөвгүүдийн дунд илүү их тархалттай, сэтгэл зүйн хүчирхийлэл охидын дунд илүү их тархалттай байгаа үзүүлэлтийг судалгаа харуулжээ.