“Тэмбүүг устгая” аяны хүрээнд Монгол орон даяар нэгдсэн арга хэмжээ үргэлжилж байгаа. Үйл ажиллагаа эрүүл мэндийн байгууллагуудын нэгж, тасгууд дээр хэрхэн явагдаж байгаа талаар Завхан аймгийн ЭМГ-ын "Эрүүл мэндийн боловсрол, мэдээлэл, сургалт, сурталчилгаа хариуцсан мэргэжилтэн Д.Отгонсүрэн, АНЭ-ийн ДОХ/БЗДХ-ын кабинетын их эмч Д.Норжинсүрэн нар дараах мэдээллийг өгч байна.

-“Халдварт өвчнөөс сэргийлэх, хянах үндэсний хөтөлбөр”-ийн хэрэгжилтийг эрчимжүүлэх хүрээнд Эрүүл мэндийн яамнаас “Тэмбүүг устгая” үйл ажиллагааны хүрээнд Завхан аймгийн хэмжээнд дараах үйл ажиллагааг зохион байгууллаа.

“Тэмбүү, сүрьеэ өвчний гаралтыг бууруулахад шийдвэр гаргагчдын дэмжлэг, нөлөөлөл” уулзалтыг аймгийн ЗДТГ, Глобаль сан, ХӨСҮТ, Нийгмийн Эрүүл мэндийн төв, ЭМГ болон Сэлэнгэ аймгийн ЭМГ-ын дарга удирдлагуудтай хамтран Завхан аймгийн 24 сумын Засаг дарга, Эрүүл мэндийн төвийн эрхлэгч нарт сургалт зохион байгуулж, хүн амын эрүүл мэндийн талаар санал солилцлоо. Уулзалтын үр дүнд  Завхан аймгийн Нөмрөг суманд 70 гаруй эмч, эмнэлгийн мэргэжилтний баг хоёр өдрийн турш ажиллаж, халдварт болон халдварт бус өвчний эрт илрүүлгийн үзлэг оношилгоо хийж, бүх төрлийн үзлэг оношилгоо хийлээ. Үзлэгт тус сумын 1400 иргэн хамрагдах байснаас 1202 иргэн хамрагдаж, тус сумын нийт хүн амын 81.3 хувь нь бүрэн хамрагдсан. Энэхүү үйл ажиллагаа тус аймгийн 24 суманд цааш үргэлжлээд явна гэв. Одоогийн байдлаар Завхан аймгийн 24 сумын 10 мянган иргэн эрт илрүүлэг, үзлэгт хамрагдсан.