Өмнөговь аймгийн Даланзадгад сумын ИТХ өнөөдөр хуралдаж байна. Уг хурлаар Даланзадгад сумын Засаг дарга Т.Алтансүхийг огцруулах асуудлыг хэлэлцэж байгаа юм байна. Тус сумын Засаг дарга Т.Алтансүхийн дур зоргоороо авирлах үйлдэл нь хэрээс хэтэрч МАН-ын зарим шударга гишүүд нь түүнийг эсэргүүцэж огцруулахаар болжээ. Ийнхүү Даланзадгад сумын Засаг даргыг огцруулах болсон үндэслэлээ ИТХ-ын төлөөлөгчид нь дараахь баримтад тулгуурлан гаргаж тавьж байгаа аж. 

 Тодруулбал, Засаг дарга Т.Алтансүх нь 2018 оны төсвийн хөрөнгө оруулалтаар батлагдсан Төрийн үйлчилгээний автомашин буюу хот тохижилтын зам талбайн үйлчлэгээний ажилчдыг зөөвөрлөх унаа авах байсан 70 сая төгрөгийг  дур мэдэн тансаг хэрэглээнд зарцуулжээ. Уг мөнгөөр өөрийн орлогч Э.Мөнхболорт “Harrier” маркийн машин, Тамгын газрын дарга Ж.Даваахүүд “Alphard” маркийн машин, хот тохижилтын дарга Ж.Баатар гэгч нөхөрт “Probox” маркийн машинуудыг авчээ.

 Даланзадгад сумын ИТХ нь 31 төлөөлөгчтэй бөгөөд АН-аас 15, МАН-аас 16 төлөөлөгчтэй аж. Нэг суудлын илүүгээр сумын ИТХ-д олонхи болсон МАН хөрөнгө оруулалт, бүтээн байгуулалтын ажлын төсвийн зарцуулалтаа нууцлан, төсвийн болон шилэн дансны хуулиудыг зөрчин, ил тод байдлыг хангахаас зайлсхийж байгаагаар үл барам 2017, 2018, 2019 онуудад төсвийн хөрөнгийг хэрхэн зарцуулсан, бараа, ажил, үйлчилгээ хэрхэн худалдан авснаа ч  тайлагнаагүй байна.

 Түүнчлэн Даланзадгад сумын ИТХ-ын даргын төрийн албан хаагчдыг гарал үүсэл, үзэл бодлоор нь ялгаварлан гадуурхах үйлдэл нь цадигаа алдсан гэж төлөөлөгчид нь үзэж байгаа аж. Жишээ нь, хотын Захирагчийн ажлын албаны даргаар ажиллаж байсан Н.Лувсанбаярыг ажлаас нь үндэслэлгүй халж, энэ нь бүх шатны шүүхээр нотлогдон буцааж ажилд нь авах тухай  2018 оны 08-р сарын 03 нд 143/ШШ2018/316 дугаартай Өмнөговь аймгийн сум дундын иргэний хэргийн анхан шатны, 2019 оны 5-р сарын 06 ны 143/Ш32019/00393  тоот шүүгчийн захирамж, 2020 оны 01-р сарын 07-ний өдрийн 01/34 албан тоот гарсан ч биелүүлэлгүй өнөөдрийг хүрчээ. Энэ мэт эрх мэдлээ хэтрүүлсэн хууль бус үйлдлүүд гаргасаар байгаа тул Даланзадгад сумын Засаг даргыг огцруулах асуудлыг ИТХ-ын хуралдаанаар хэлэлцэж байгаа юм байна.