Удтал хүлээсэн бороо өнгөрөгч амралтын өдрүүдээр орж, хүн малын зоо тэнийх шиг боллоо. Бороо орох хэдий сайхан ч, бодлогогүй хэдэн дарга нарын маань ажилд гайгүй сайн дүн тавьчхаад байдаг гэмтэй. Үерт автаж, эвдэрч гэмтсэн замыг нүдээ аниад өнгөрүүлье гэхэд хотын төвд, замын голд байрлуулсан алтан шар хайсны түүхийг бичихгүй байж үнэхээр чадашгүй нь. Уг нь жолооч нар маань тэр хайснуудын голд хүрд хийчхээд түгжирч явах зуураа гандангийн ажлаа амжуулах гайхалтай санаа гаргаад байсан юм сан. Даанч өнөө өндөр өртөгтэй, туйлын ач холбогдолтой хашлаганууд маань анхны борооноор нураад уначихдаг нь тоогүй.

Урд хөршөөс шилж сонгож, захиалж авчруулсан хотын менежер Т.Гантөмөр уг нь “Хайс нэг бүр нь 70-80 кг жинтэй, өөрөөсөө хүндрүүлэгчтэй, стандартад нийцсэн хамгийн сайн хашлага” гэж хэдхэн хоногийн өмнө хэлсэн дээ. Түүний амнаас үсэрсэн шүлс хатаж амжаагүй байтал 700 сая төгрөг салхинд хийсчихэв бололтой. 

Ядаж байхад, зарим хэрэгт дуртай, тоонд толгойтой гарууд нь урд хөршөөс оруулж ирэх хайсны үнийг тооцоод гаргачихсан байдаг нь ч юу вэ дээ. Тэдний тооцоолсноор 5000 метр хашааг оруулж ирэх үнэ нь хамгийн ихдээ 185 сая төгрөг болж байгаа юм байх. Үүнд ачигчийн хөлс, гаалийн татвар орж байгаа гэсэн шүү. Ингэж л, Т.Гантөмөр дарга тэргүүтэй, манай талын баатруудын хагас тэрбумын ашигтай наймаа олны өмнө ил болсон болсон түүхтэй.
Чухамдаа, хотын өнгө үзэмжийг нэмж, замын хөдөлгөөнийг сайжруулах гэсэн манай дарга нарын чин хүсэл эрмэлзлийг ойлгодоггүй Монголын “орк” салхи, бороог яалтай билээ.