Өдрийн хоолонд эзэн олон гэдэг шиг уржигдрын бороо зүгээр ч нэг ороогүй бололтой. Цахим орчинд нэгэн хувилгаан “Дэлхийн дөрвөн том далайгаас гуйж биш гуядаж авчирсан бороог Монгол нутаг минь таалан болгооно уу” гэсэн пост оруулжээ. Түүнийг хур бороо гуядаж авчирч буйг “вангадаж” чадсанаараа зарим нэг нь омогшиж, нэлээд лайк цуглуулсан харагдлаа. Харин нөгөө талд, үлгэрт итгэдэг зарим нь Сүмбээ хүүг хурганы арьс сэгсэрч хур бороо оруулсан гэж батлаад эхлэв ээ.

Алинд нь итгэхээ мэдэхгүй гайхаж байтал азаар өчигдөр Цаг уур орчны шинжилгээний газраас нэлээд шинжлэх ухаанч тайлбартай мэдээлэл хийлээ шүү. Тэдний танилцуулснаар “Өнгөрөгч дөрөв, тавдугаар сард 21 аймаг, Улаанбаатар хотод 38 экспедиц гарч, 175 удаа бороо оруулах ажиллагаа явуулсан” гэж байна. Ингэхдээ 386 ширхэг пуужин зарцуулж, үүлэнд зориудаар нөлөөлсөн гэв. Бас болоогүй, зүгээр ч нэг пуужин биш БНХАУ-аас оруулж ирсэн “JFJ-1A” загварын пуужин юм байх. Энэ гайхалтай пуужингаар цаг уурын ажилчид маань хоёр сарын турш өдөр шөнөгүй буудсаны хүчинд ийнхүү хүн зоны ган тайлагдсан гэдгийг мэдээллийн төгсгөлд тэд онцолсон юм.

Том зургаар нь харвал, түмэн олноо гэсэн чин сэтгэлтэй ийм олон гайхалтай хүмүүс байгаад талархаад баршгүй. Тэнгэр заяат монголчуудын нэг болсноороо бахархаад ханашгүй.
Гэхдээ, цаг уурчид маань энэ удаад пуужингаа арай ихдүүлсэн бололтой. Учир нь, хэдэн өдөр үргэлжилсэн борооны улмаас манай улс нэлээд хохирол амсаад байна. Зам даваа хаагдаж, тариан талбай усанд автаж, зургаан хүн эрдэнэт амь насаа алдаад буйг тоохгүй өнгөрч боломгүй. Тийм болохоор дараагийн удаад хутагт хувилгаан, цаг уурчид, Сүмбээ тэргүүтэн зөвлөлдөж байгаад ээлж, ээлжээр хур борооны увдис аа гаргаж байгаарай гэж эгэл ардыг төлөөлж захья даа.