Нүүр ном, жиргээч болжмор, олон нийтийн сүлжээ ямар хүчтэй болохыг өчигдөр болсон нэгэн үйл явдал дахин баталлаа. Өнөөдөр манай улсад яам тамгын газар, төрийн байгууллагууд олон нийтэд таалагдсан мэдээ мэдээлэл цацаж байвал юу ч хийхээс буцахгүй болсон юм даг. ЦЕГ-ын Хар тамхитай тэмцэх газраас нэгэн мэдээлэл хийхдээ хурандаа Ж.Эрдэнэболд “Он гарсаар хар тамхитай холбоотой гэмт хэргийн гаралт огцом өсч байна. Энэ нь телевизээр хар тамхины хэрэглээг харуулсан уран бүтээл гаргаж байгаатай холбоотой. Жишээлбэл, МҮОНРТ-ээр гарч байсан Колумбын хар тамхины бүлэглэлийн тухай “Пабло Эскобар” кино иргэдэд сэдэл өгч байгаа тул нэвтрүүлэхгүй байх тухай шаардлага хүргүүлсэн” гэв. 

Дээрх мэдээлэл сайтуудаар цацагдаж эхлэхтэй зэрэгцээд олон нийт “ЦЕГ ниргэсэн хойно нь хашхирав. Аль эрт энэ киног хориглох байсан юм” гэх мэтээр байр сууриа илэрхийлцгээж эхэлсэн юм.

Гэтэл үүнийг анзаарсан ЦЕГ-ын Хэвлэл мэдээллийн албаны дарга Б.Баатархүү Цагдаагийн байгууллагын талаар сөрөг мэдээлэл гарах нь гэж сэрэмжилсэн бололтой. Тэр дор нь, “Пабло Эскобар”-ыг МҮОНРТ-ээр гаргахыг бид хориглоогүй. Худал мэдээлэл” гэдэг юм байна. 
Ингээд олон нийт яг ямар мэдээлэл хийсэн юм бол гээд гайхаад байж байтал МҮОНРТ-ийн захирал Л.Нинжжамц цахим хуудсандаа “Манай телевиз Пабло Эскобарыг дуустал нь гаргана. Манай байгууллагын нийтлэлийн бодлогод хэн ч халдах ёсгүй” гэж тусгаар тогтнолоо тунхаглан зарлав.

Уг нь МҮОНРТ нь өөрийн гэсэн зохицуулалтын хуультай. Тэр хуулийнх нь 8.3-т “Олон нийтийн радио, телевизээр харгислал, ялгаварлан гадуурхал, дайн, хүчирхийлэл, садар самууныг сурталчилсан, иргэний нэр төр, алдар хүнд, ажил хэргийн нэр хүндэд халдсан агуулгатай нэвтрүүлэг бэлтгэж түгээхийг хориглоно” гэсэн заалт байдаг юм билээ.