Хүүхдүүд яагаад хэтэрхий их сахилгагүй, уур уцаартай, эцэг эхийнхээ үгийг сонсдоггүй болдог тухай та анзаарч, бодож байсан уу. Харамсалтай нь, дийлэнх эцэг эх бүх бурууг хүүхдээсээ л хайдаг. Хүүхдийн хүмүүжил эцэг эхийн зан харилцаанаас эхэлдэг. Та хүүхдийнхээ дэргэд бусдад худал хэлж, тэднийг үл ойшоож, сонсдоггүй бол Таны хүүхэд аажмаар л буруу алхмуудыг хийж эхэлдэг. Тиймээс аав, ээж болсон та бүхэн тэдэнд зөвөөр үлгэрлэж, бахархал нь болохыг зорих ёстой. Үүний тулд гэнэтхэн ид шидээр өөрчлөгдөхгүй нь ойлгомжтой. Аажмаар суралцаж, зөв үйлдэл хийдэг сайн аав, ээж болохын тулд хичээх нь зүй. Энэ нь маш энгийн зүйлээс л эхэлнэ.
Эхлээд хүүхдээ сонсч, тэдэнд дэмжлэг үзүүлж эхлээрэй. Хүүхэдтэйгээ харилцаж, орой бүр өдөр юу хийсэн, сэтгэл санаа нь ямархуу байсан талаар асууж ярилцаарай. Мэдээж тэдний насны онцлог, сэтгэл зүйд тохируулан харилцахын тулд хүүхдийн сэтгэл зүйн хөгжил нэг наснаас нөгөөд шилжихдээ хэрхэн өөрчлөгддаг тухай судалж, уншаарай. Бид болон тэдний хооронд асар их ялгаа, зааг байдаг учраас аливаа асуудлыг өөрөөр харж, тайлбарладаг байж болох юм. Мэдээж үүний тулд огт өөр мэргэжлээр дахин суралцаж, цаг зарцуулах хэрэггүй. Өөрийгөө бага зэрэг боловсруулахад л хангалттай. Цаашлаад та хүүхэдтэйгээ хамт суралцаж, хөгжиж, харилцаагаа бататган улам туршлагажих болно.
Хүүхдийнхээ дэргэд хэрэлдэхгүйгээс гадна тэднийг алдаа гаргахад хүлээцтэй хандаж, зөв, бурууг нь ялган тайлбарлаж байх нь зөв. Энэ тухай эхнэр, нөхрүүд хоорондоо ярилцаж, хүүхдэдээ итгэл, үнэмшил төрүүлэх хүмүүжлийн аргыг бодож олоорой. Гэр бүлээрээ явдаг аялал, эсвэл ямар нэг зүйлийг онцолсон нэрэмжит өдөр тэмдэглэх гээд харилцаагаа бататгах боломж олон бий. Бага насны хүүхдүүдэд ээжийнх нь сэтгэл санааны хямрал, бухимдал сөргөөр нөлөөлдөг учраас анхаарах хэрэгтэй. Зарим ээж энэ бүхнийг мэддэг ч анхааралгүй орхидог. Энэ нь хүүхдийн зан төлөвшилд шууд нөлөөлдгийг эрдэмтэд хэдийнэ нотолжээ. Өөртөө итгэлгүй ээжийн хүүхэд зориггүй, дүнсгэр болох нь бий. Мөн хүүхдийнхээ хажууд нэг нь нөгөөгийнхөө сул талыг дөвийлгөн ярьж, муу зуршлуудыг нэрлэх нь зөв алхам биш. Хүүхдүүдийн хавьд эцэг, эх нь үлгэрлэж болох хамгийн сайн хүмүүс нь байдаг.