Хатмал цөлд явахад хар ус амттай
Харанхуй шөнийн дунд өнчин зул гэрэлтэй
Жаргал ховор цагт жаргалын бага нь амттай
Хэт элбэг жаргал дунд хэсэгхэн зовлон бас амттай
Р.Чойном

Сод билэгт Монгол найрагч ийн бичсэн удаатай. Яг үүн шиг аз жаргалтай, амжилттай амьдралд стресс асар их хэрэгтэй гэдгийг сэтгэлзүйчид саяхан тогтоожээ. Бүр тодруулбал Стэнфордын их сургуулийн профессор Келлин Макконигал энэ тухайгаа “The upside of stress” хэмээх бүтээлдээ дэлгэрүүлэн тайлбарласан байна. Тэд олон жилийн турш хүмүүсийг судалснаар бага зэргийн стресс тэднийг аз жаргалтай болгож, цаашид тэмцэн босох чадварт нь эерэг нөлөө үзүүлдгийг илрүүлжээ. Тэр ч бүү хэл илүү их стресстэй хотод амьдардаг иргэд бусдаасаа 30 хувиар илүү амжилттай байсан гэнэ.
Тэгвэл бид аль болох бухимдахгүйг хичээж, тав тухыг эрэлхийлснээр тэмцэгч чадвараа алдаж, алс хэтдээ ачаа даах тэнхээгүй болдог аж.
Амьдрал тэр чигтээ тэнцвэр юм гэдгийг ч энэ ухагдахуун баталж буй. Таарсан зовлон, тохирсон бэрхшээл, гүехэн стресс танд ч, надад ч хэрэгтэй. Үлгэрт гардаг шиг тав тух, найр цэнгэл, элбэг хангалууныг хүсэхийн хэрэггүй. Эрдэмтдийн судалгаагаар бүх зүйл нь бэлэн болж, тайван байдалд шилжсэн хүмүүсийн дунд сэтгэл гутрах өвчин түгээмэл байдаг нь илэрсэн байна лээ. Өндөр хөгжилтэй орны тэтгэвэрт гарсан иргэдийн жишээгээр үүнийг баталсан байсан. Амьдралын баяр, гунигийг тэгшхэн хүртэж, ажилдаа яарч, заримдаа адгаж, бухимдаж, шаналж байгаа минь ч гэсэн аз жаргал юм шүү гэдгийг тунгааж амьдралынхаа хором бүрийг нандигнаж яваарай.