“Монголд бид үйлдвэрлэв" ТББ, "Exclusive" компанийн захирал Г.Майцэцэг жижиг дунд үйлдвэрлэл эрхлэгчдийг бодлогоор дэмжихийг Засгийн газраас шаардаж буйгаа өчигдөр мэдээллээ.Тэрээр хэлэхдээ “Жижиг дунд үйлдвэрлэлийг дэмжих сангаас зээл авах хүсэлтэй иргэдийн хүсэлтийг тавдугаар сарын 27-ноос зургадугаар сарын 10-ны хооронд хүлээн авсан. Энэ сангаас олгож байгаа тус зээлийн гол онцлог нь урт хугацаатай, хүү багатай учраас үйлдвэрлэлээ хөгжүүлэх боломжийг ЖДҮ эрхлэгчдэд олгодог. Энэ жил нийт 2,752 иргэн, аж ахуйн нэгжийн 487 сая төгрөгийн зээлийн хүсэлтийг хүлээн авч, цахим системд бүртгэлээ. Үүнээс хөдөө, орон нутагт 20 - 200 сая төгрөгийн 1,341 иргэн, аж ахуйн нэгжийн 105 сая төгрөгийн зээлийн хүсэлт, Улаанбаатар хот буюу ЖДҮХСан дээр 1,411 иргэн, аж ахуйн нэгжийн 381 сая төгрөгийн зээлийн хүсэлт бүртгэгдсэн байна. Жижиг дунд үйлдвэрлэл гэдэг жижиг асуудал биш, том асуудал. Тиймээс төсөл бичсэн иргэн бүрийн төсөл нь ажил хэрэг болж, үйлдвэрлэл эрхэлдэг байгаасай. Ажлын байр нэмэгдүүлэх, улс орноо хөгжүүлэх, иргэдээ орлоготой байлгах хамгийн том салбар бол яах аргагүй жижиг, дунд бизнес эрхлэгчид байдаг. Монгол Улсын хэмжээнд 2753 иргэн аж ахуйн нэгж 487 тэрбум төгрөгийн санхүүжилт хүссэн байна. Гэтэл өнөөдөр УИХ-ын гишүүд энэ мөнгийг хэрхэн төсөвт суулгаж, эдгээр иргэн аж ахуйн нэгжүүдээ дэмжих талаар ярихын оронд, дэмий хэрэлдээд сууж байгааг харж байна. Нэг жишээ хэлэхэд, ганцхан хоногийн салхинд нурж унасан шар хайсанд 750 сая төгрөг зарцуулахын оронд олон арван жижиг дунд үйлдвэрлэгчийг дэмжих боломжтой байсан. Хөдөө орон нутагт хамгийн багадаа 10 сая төгрөгийн зээл хүссэн иргэд олон бий. Энэ 750 сая төгрөгөөр хэдэн жижиг дунд үйлдвэрлэл эрхлэгчдийг дэмжиж болох байсныг тооцоод үз дээ. Тиймээс жижиг дунд үйлдвэрлэгчдээ дэмжиж ажилладаггүй Засгийн газрыг огцруулъя гэж ард түмэндээ уриалъя” гэлээ.

Эх сурвалж: АРДЧИЛАЛ ТАЙМС СОНИН