“Хар тамхи, мансууралтай тэмцэх” дэлхийн өдрийг тохиолдуулж, Цагдаагийн ерөнхий газрын Хар тамхитай тэмцэх газраас холбогдох байгууллагуудтай хамтран Буянт-Ухаа, Сэлэнгэ аймгийн Алтанбулаг, Өмнөговь аймгийн Гашуунсухайт, Дорноговь аймгийн Замын-Үүд боомтууд болон Орхон аймгийн Баян-Өндөр суманд хар тамхи, мансууруулах бодистой холбоотой гэмт хэрэг, зөрчлөөс урьдчилан сэргийлэх, ухуулга, нөлөөллийн арга хэмжээ зохион байгуулах гэж байна.
Мөн энэ өдөр Монгол Улсын иргэдийг гадаад улсад зорчихдоо энэ төрлийн гэмт хэрэгт холбогдох мөн хүний гуйвар болон мөнгө амласан ачаа тээш авахгүй байх, авсан тохиолдолд сайтар шалгах тухай сэрэмжлүүлэг мэдээллийг хүргэлээ.
Зорилтод бүлгийн иргэдэд Сэтгэцийн эрүүл мэндийн үндэсний төвийн эмч, ажилтнуудтай хамтран хор хөнөөлийн талаарх сургалт мэдээллийг зохион байгуулахын зэрэгцээ тухайн аймгуудын хилийн боомтод ажиллаж буй хууль сахиулах байгууллагын алба хаагчдад энэ төрлийн гэмт хэрэгтэй тэмцэх, илрүүлэхэд анхаарах асуудал сэдвээр мэргэшүүлэх сургалтыг тус тус зохион байгуулна гэв.
Энэ төрлийн гэмт хэргийн статистикийг харвал 2018 онд 199 гэмт хэрэгт 402 хүн холбогдон шалгагдсан бол 2019 оны эхний хагас жилийн байдлаар улсын хэмжээнд 96гэмт хэрэгт 188 хүн холбогдон шалгагдаж байна.
Урд оны мөн үетэй харьцуулахад гэмт хэрэг 7,3 хувиар буюу долоон нэгжээр, холбогдогч 1,1 хувиар буюу хоёр нэгжээр өсчээ.
Нийт холбогдогчийн 87,2 хувь буюу 164 нь эрэгтэй, 13,8 хувь буюу 24 нь эмэгтэй бол 86 хувь нь 19-35 насны залуучууд, 4,7 хувь буюу ес нь насанд хүрээгүй хүн байна.
Гэмт хэрэгт холбогдогчдын 54,2 хувь нь эрхэлсэн тодорхой ажилгүй бол боловсролын байдлаар нь үзвэл 67,5 хувь нь бүрэн дунд, 23,4 хувь нь дээд, 6,3 хувь нь бүрэн бус дунд, нэг хувь нь тусгай дунд боловсролтой.
Гадаад улсын долоон иргэн энэ төрлийн гэмт хэрэгт холбогдсоны ХБННУ-ын иргэн байгаа бол БНСУ, Франц, Энэтхэг улсын тус тус нэг хүн байна.
Орон нутагт 2019 оны хагас жилийн байдлаар 13 гэмт хэрэг бүртгэгдсэн. Үүнд,

• Орхон аймагт 8,
• Сэлэнгэ аймагт 1,
• Булган аймагт 1,
• Төв аймагт 1,
• Дорнод аймагт 1,
• Өмнөговь аймагт 1 гэмт хэрэг тус тус бүртгэгдсэн гэдгийг ЦЕГ-ын Хэвлэл мэдээлэл, олон нийттэй харилцах төвөөс мэдээллээ.

Эх сурвалж: АРДЧИЛАЛ ТАЙМС СОНИН