Бүрэн эрхийнх нь хугацаа дуусахад хэдхэн хоног үлдсэн Ерөнхийлөгч Х.Баттулгыг одон медаль тарааж, хүн амын дунд эрсдэлтэй нөхцөл үүсгэхгүй байхыг олон нийт шаардаж эхэллээ. Ерөнхийлөгч Х.Баттулга тавдугаар сарын 18-наас эхлэн Алдарт эхийн одон, төрийн шагнал гардуулж эхэлсэн. Ингэснээр төв талбай сүүлийн 20 гаруй хоног олны хөлд дарагдаж, найр наадам үргэлжилсээр...

Манай улсад 3-4 дүгээр сард халдвар авах иргэдийн тоо өдөрт мянга давж байсан бол өнгөрсөн сараас буурсан. Гэсэн ч харамсалтай нь сүүлийн өдрүүдэд эргэн нэмэгдэж, мянга давчихаад байна. 

Цар тахлын халдвар буураагүй энэ цаг үед одон авсан ээжүүд хүүхдүүдээ талбайд дагуулж ирсэн нь халдварт өртөх эрсдэл болж байна. Энэ нь ч батлагдаж ЭМЯ-аас жирэмсэн ээжүүд болон хүүхдүүдийн дунд халдварын тархалт өндөр байгааг мэдээлж байна. Сүүлийн хэдэн өдрийн мэдээллээр 5-р сарын сүүлээр болон 6 сарын эхээр халдвар авсан иргэд тоо буурахгүй байгаагаас гадна нас баралт ч гэсэн тухайн өдрүүдтэй дахцаж байна. Тэгэхээр Ерөнхийлөгч Х.Баттулга “Хөдөлмөрийн баатар”, “Гавьяат”, “Алтангадас” зэрэг төрийн шагналаас гадна “Алдарт эх”-ийн одонг өнгөрсөн сарын 18-наас өдөр  алгасахгүй тарааж эхэлсэн нь цар тахлын нөхцөл байдал хүндрэхэд хүргэсэн байж болзошгүй.

Шагнал авч байгаа иргэдийг буруутгах аргагүй ч цар тахлын нөхцөлд, иргэдийг олноор цугларахад хүргэж, бүрэн эрхийнхээ хугацааг дуусахаас өмнө шагнал тарааж байгаа Ерөнхийлөгч Х.Баттулгыг энэ үйлдлээ зогсоохыг твиттер, фэйсбүүк зэрэг сошиал орчинд иргэд эсэргүүцэж эхлээд байна. 

Зөвхөн нийслэлд гэлтгүй хөдөө орон нутагт ч шагналын хур бууж байгаа. Энэ хэрээр хүмүүсийн бөөгнөрөл үүсч, халдвар тархахнөхцөлийг бүрдүүлэхээр байгаа учраас Ерөнхийлөгч Х.Баттулгыг улс орон, ард түмнийхээ эрүүл мэндийн эсрэг ажиллахгүй байхыг олон хүн сануулж байгааг зориуд дуулгая. Хамгийн гол асуудал нь хөл хорио бүрэн тавигдаагүй, бага насны хүүхдүүд вакцинд хамрагдаагүй байхад ийнхүү өдөр бүр шагнал гардуулж, олон нийтийг цуглуулсан нь халдвар нэмэгдэх эрсдэл бий болох вий гэсэн сэрэмж байгаа юм.